Karekezi yisubiyeho. Ubu yasinye mu kiciro cya gatatu muri Swede

Umukinnyi Karekezi Olivier mu mpera z’uyu mwaka yatangaje ko yahagaritse umupira burundu, uyu musore wari umaze iminsi micye asubiye muri Sweden aho yigeze gukina, ubu byamenyekanye ko yaraye asinyiye ikiye ya Trelleborgs FF yo mu kiciro cya gatatu muri Swede.

Kuwa 22 Mutarama nibwo uyu mukinnyi ngo yasinye amasezerano n’iyi kipe nk’uko urubuga rwayo rubitangaza.

Iyi kipe ku rubuga rwayo yamaze gutangaza ko yumvikanye n’uyu munyarwanda kuzabakinira muri uyu mwaka wa 2014.

Karekezi yagiye muri Swede avuga ko agiye kwivuza imvunemu  ivi ry’akaguru k’imoso. Yatangaje ko ubu yamaze kubagwa kandi yizeye gukira mu gihe cy’amezi abiri dore ko shampionat y’ikiciro cya gatatu izatangira mu kwezi kwa kane muri kiriya gihugu.

Nyuma yo gutangaza ko asezeye ku mupira burundu ndetse mu mpera z’uyu mwaka agataha mu Rwanda avuye mu ikipe ya Club Bizertin yakiniraga muri Tunisia, uyu mukinnyi yavuze ko yumva yazakomereza ku kuba umutoza.

Muri Swede aho agiye gukina yemeje ko azajya akina ariko akaniga akanakurikirana amasomo y’ibijyanye no gutoza umupira bityo narangiza gukina akazahita yinjira mu gutoza.

Uyu mukinnyi yaciye mu makipe nka APR FC (ari nayo yamureze), Helsingborgs IF (Suede) Hamarkameratene (Norvege), Östers IF (Suede) na CA Bizertin yo muri Tunisia.

ububiko.umusekehost.com