Kanyankore yaje gutoza ikipe ya Kiyovu Sport

Amakuru ava mu ikipe ya Kiyovu Sport ni uko umutoza Gilbert Kanyankore uzwi cyane ku izina rya Yaounde yamaze gusinya muri iyi kipe igihe cy’umwaka umwe nkuko byemezwa na Sendege Norbert umuyobozi w’iyi kipe ya Kiyovu.

Uyu mutoza w’umunyarwanda ariko wakoreye cyane i Burundi avuye mu ikipe ya Vitalo’o yari amazemo igihe kinini ndetse akaba aherutse kuyihesha igikombe cya CECAFA Kagame cup yaberaga muri Sudani.

Kanyankore wavukiye mu Rwanda agakurira mu gihugu cy’Uburundi ntabwo yaje wenyine muri Kiyovu Sport kuko yahazanye n’umukinnyi Laudit Mavugo nawe Kiyovu Sports yasinyishije imuvanye muri AS Kigali.

Kanyankore ni umutoza wize ibya sport muri Kaminuza i Kinshasa.

Yatangiye gutoza ikipe ya Vitalo’o mu 1986 agenda agaruka kugeza ubu, amaze gutwara ibikombe bya shampionat i Burundi bigera ku umunani.

Uyu mugabo mu 1999 ubwo yari mu Rwanda yatwaye CECAFA atoza muri Rwanda B nk’umutoza wungirije.

Mu 2005 ubwo yari mu Rwanda atoza ikipe ya Les Citadins (ubu AS Kigali) yaje no kugirwa umwe mu batoza batoza ikipe y’Amavubi. Iki gihe ndetse kugeza mu 2006 yigishaga umupira mu ishuri rikuru ry’inderabarezi rya Kigali KIE.

Aje mu ikipe ya Kiyovu Sport yari imaze igihe kinini nta mutoza mukuru ifite nyuma y’uko Kayiranga Baptista yeguye muri Phase aller ya shampionat y’u Rwanda yarangiye.

Kiyovu Sport imaze gutakaza bamwe mu bakinnyi bayo  nka Mutarambirwa Djabir ubu werekeje mw’ikipe ya Police FC, Bate Shamiru umunyezamu werekeje muri Espoir(Rusizi), Julius Bakkabulindi na Niyonkuru Djuma Radjou berekeje muri La Jeunnesse, amakuru anugwa nugwa nuko na kapiteni wabo Serugaba Eric ashobora kwerekeza muri Police FC.

JD NSENGIYUMVA Inzaghi
UM– USEKE.RW