Kamuhanda : kuwa kane ni umunsi w’Isoko ry’Itabi gusa

Itabi riturutse i Burundi, DR Congo, Uganda n’irituruka mu bice bitandukanye by’u Rwanda rihurira mu isoko rya Kamuhanda buri wa kane w’icyumweru nk’umunsi iri soko ricururizwamo itabi gusa.

Iri soko riherereye mu karereka Kamonyi ukinjira mu ntara y’Amajyepfo uvuye mu mujyi wa Kigali wambutse umugezi wa Nyabarongo mu kuboko kw’iburyo.

Usibye abarihashora n’abaza kurirangura ntabantu benshi bazi ko uwo munsi wa kane wagenewe ubucuruzi bw’itabi gusa ku isoko rya Kamuhanda.

Ubusanzwe iri soko rihinda cyane kabiri mu cyumweru, ku cyumweru no kuwa kane, ariko kuwa kane ukaba umunsi wahariwe abacuruza itabi bavuye ahatandukanye mu gihugu no hanze yacyo.

Ku cyumweru bwo abantu batuye mu mujyi wa Kigali usanga hari benshi baje kwihahira muri iri soko riri mu nkengero z’Umujyi baje guhaha ibiribwa cyane cyane biba biri ku giciro kiri munsi y’icyo mu mujyi.

Abel Kabagambe ni umunya Uganda uzana itabi ry’ibikamba ku isoko rya Kamuhanda, avuga mu Rwanda ahabona agafaranga kubera igikamba ahazana.

Ati « Kuwa gatatu mu gitondo nzindukana Fuso (imodoka y’ubwikorezi) yuzuye itabi duhinga iwacu, cyangwa naranguye za Ntungamo na Kabale, kuwa kane mba nageze hano nje gucuruza. Akenshi ndaricuruza rigashira niyo ridashize ndisubizayo nkaricuruza Uganda. »

Umwe mu banyarwanda bacuruza itabi hano wavuze ko yitwa Emmanuel we yatubwiye ko itabi rigurwa cyane hano. Ati « ikibazo ni umusoro uri hejuru utuma akanyungu kaba gacye. »

Itabi ry’igikamba rinyobwa cyane n’abaza n’abacyecuru, usibye ko n’inganda ariryo ziheraho zitunganya amasegereti, ubu yazamuye igiciro.

Naho ku binywera iryo bitekereye rero ku isoko rya Kamuhanda kuwa kane ni umunsi waryo gusa.

Nubwo rigira ingaruka mbi ku buzima, tukaba tutanashishikariza uwo ariwe wese kunywa itabi, ariko riranyobwa ndetse abarinywa kurireka ngo si ikintu cyoroshye.

Plaisir MUZOGEYE
UM– USEKE.COM