Kamonyi: Umugabo yishe umugore we nyamara baraye basangiye inzoga

Mu murenge wa Kayumbu mu kagari ka Giko umugabo witwa Evariste Karemera ubu yaburiwe irengero nyuma y’uko mu ijoro ryekeye yishe umugore we Mutesi Thacienne amukubise kintu cy’icyuma mu gahanga agahita apfa.

Abaturanyi bavuga ko uyu mugabo n’umugore we baherukaga kubabona nimugoroba basangira inzoga ku gacentre nta kibazo, ndetse n’ubuyobozi buvuga ko nta kibazo kizwi aba bantu bafitanye umwana umwe bari bafitanye cyatuma bicana.

Abana babo (babiri b’umugore n’umwe babyaranye) ngo nibo batabaje abaturanyi ahagana saa munani z’ijoro kuri uyu wa kane. Ariko ngo ni abana bato ku buryo batabasha gusobanura icyo ababyeyi bapfuye.

Kubwimana Jean de Dieu Umunyamaba Nshingwabikorwa w’umurenge wa Kayumbu yabwiye Umuseke ko nta kibazo cyatuma bicana bari bazi kuri Evariste w’imyaka 40 na Thacienne, 39. Ndetse ko bumvise ko ejo nimugoroba bari kumwe mu gacentre basangira.

Ati “Gusa hari hashize umwaka n’igice bagiranye amakimbirane mu rugo turabimenya turabahamagara turabunga bikaba byari byarashize babanye neza”

Ubwo abaturanyi batabaraga bumvise induru y’abana ngo basanze Thacienne amerewe nabi cyane kubera ikintu yakubiswe mu mutwe ukameneka.

Yabanje kujyanwa kuri centre de Sante ya Rutobwe  babonye bikomeye cyane ajyanwa i Kabgayi ariko apfa atagezeyo.

Abana bavuze ko ari se wagikubise nyina, ndetse uyu mugabo akaba yaburiwe irengero kugeza ubu nubwo ari gushakishwa n’inzego z’umutekano.

Evariste ukomoka Ngororero ngo yari yarinjiye uyu mugore w’umupfakazi amusangana abana be babiri.

Josiane UWANYIRIGIRA
UM– USEKE.RW