Kamonyi: Inzu bamwe mu barokotse batuyemo ziteye inkeke

Bamwe mu batuye mu mudugudu wa Kanyinya watujwemo imfubyi; bapfakazi n’incike basizwe iheruheru na jenoside yakorewe Abatutsi batewe impungenge n’inzu zabo zangiritse ndetse bamwe muri bo ubwoba ni bwinshi aho batekereza ko isaha n’isaha zishobora kubagwaho.

Mu mudugudu wa Kanyinya uherereye mu kagari ka Remera, mu mugenge wa Rukoma ahubakiwe imiryango 12 y’abarokotse jenoside yakorewe Abatutsi  uhita ubona ko inzu batuyemo ziteye inkeke kuko zishaje.

Abatuye muri aya mazu bavuga ko iki kibazo atari gishya ndetse ko bagerageje kukigeza ku buyobozi bukabizeza kuzagikemura ariko ngo amaso akomeje guhera mu kirere.

Nsengiyumva Theogene Iyamuremye uba aha ati “ nawe urabibona ko iki kibazo atari icy’ejo, twagerageje kukigaragariza ubuyobozi bw’Umurenge butwizeza kuzadusanira ariko twarategereje turaheba.”

Ntirubabarira Daphroza w’imyaka 77 we yabwiye Umuseke ko inzu yari yarahawe yangiritse nyamara ntahweme kubibwira ubuyobozi biza kugera n’aho igwa.

Yagize ati “…mu kagari nagiyeyo; mu murenge njyayo;…yewe no ku karere nagezeyo ariko ntibanyumva, bigera aho iragwa.

Icyakora ejobundi nibwo hari abagiraneza bo muri Panda nabonye baza barayihagarika, bashyiraho amatafari, ariko nabwo ntiyuzuye, nta gishahuro;..ntaki, ariko ubu napfuye kuba nyirimo.”

Si ikibazo cyo kwangirika gusa dore ko hari n’amazu yatujwemo aba bacitse ku icumu rya jenoside atuzuye; imyaka ikaba ibaye hafi umunani hari abayabamo uko bayahawe ntakuyuzuza.

Uwimana Jacqueine ni umwe mu baba mu nzu zituzuye, yagize ati “ bagiye batayujuje, nyibamo gutyo, ariko sinsiba ku murenge kubibutsa bakambwira ko bazaza kunsura ngo barebe icyakorwa ariko kugeza n’uyu munsi nta muyobozi urakandagira iwajye.”

Aya mazu yubatswe n’abagororwa bakoraga imirimo ifitiye igihugu akamaro TIG, andi yubakwa mu bikorwa by’umuganda bityo bamwe bakaba bemeza ko kwangirika kwayo bishobora kuba biterwa n’uburyo yubatswe bititaweho ndetse ngo amenshi yubatswe nta musingi (fondation).

Ubuyobozi buvuga ko kuba gusana aya mazu byaradindiye byaratewe n’ibindi bikorwa byo gufasha abarokotse biba byihutirwa nk’uko byatangajwe na Uwineza Claudine, umuyobozi wungirije ushinzwe ubukungu n’iterambere mu karere ka Kamonyi.

Ati “ ntabwo ari uburangare kuko hari ibindi bikorwa byo gufasha abatishoboye bacitse ku icumu rya Jenoside biba byihutirwa, ariko ubu bisa nk’ibimaze kujya ku murongo ku buryo gusana aya mazu nabyo bigiye guhita bishyirwamo ingufu.”

Uwineza avuga kandi ko kuba hari abatujwe muri aya amazu atuzuye bwari uburyo bwo kwirwanaho kugira ngo abasizwe iheruheru na jenoside babe bafite aho barambika umusaya.

Ati “ nibyo koko hari abayatujwemo atuzuye, ariko murabizi ko nyuma ya Jenoside ibibazo byari byinshi, ku buryo hari igihe ingengo y’imari yari yagenewe kubaka aya mazu yashiraga atuzuye, tukavuga tuti abantu baba bayarimo mu gihe hagishakishwa ubundi bushobozi.”

Uwineza agakomeza avuga ko kuzuza amazu atuzuye bizakorerwa rimwe no gusana ayangiritse ku buryo hatabaye impinduka uyu mwaka wazarangira byarakozwe.

Martin NIYONKURU
UM– USEKE.RW