Kamonyi: Abarokotse Jenoside n’abishe ababo bahawe inka bahuriyeho

Amatsinda agizwe n’abarokotse Jenoside yakorewe Abatutsi mu 1994, n’abagize uruhare muri iyi Jenoside bireze bakemera icyaha bibumbiye, mu matsinda y’ubumwe n’ubwiyunge bahawe inka nk’ikimenyetso kigaragza intambwe bamaze gutera biyubaka.

Aba baturage bagize ibi byiciro bibiri n’abo mu murenge wa Gacurabwenge, na Musambira bavuze ko batekereje kwibumbira hamwe mu matsinda abahuza bose, nyuma yo kubona ko ari bwo buryo bwonyine bwabafasha gukira ibikomere basigiwe na jenoside yakorewe Abatutsi mu Rwanda, aho abayikoze, bagombaga kwegera abo bahemukiye bakabasaba imbabazi, kubera ko babiciye abantu, noneho hagakurikiraho gutanga imbabazi   igikorwa kitari cyoroshye nk’uko Iryanyawera Laetitia umwe mu barokotse abivuga.

Iryanyawera yavuze ko yiciwe umugabo n’abana muri jenoside, ariko atinda kumenya ababishe, nyuma ngo yaje kubwirwa n’umuturani we witwa Gasana Jean Bosco ko ari we wishe umuryango we, amusaba imbabazi ntiyazuyaza arazimuha, gusa asigarana intimba mu mutima yumva ko atabohotse.

Buhoro buhoro uko yagendaga abona amahugurwa n’inyigisho zitandukanye zikangurira abantu kwirega, gusaba imbabazi ndetse no kubabarira byaje kuba ngombwa ko ababarira Gasana abikuye ku mutima bajya no mu itsinda rimwe ry’ubumwe guhera icyo gihe.

Yagize ati “Iyi niyo nzira yonyine ishoboka yo kubanisha Abanyarwanda kandi niyo nahisemo kugira ngo bimpeshe amahoro mu mutima, ibi byose mbikesha umuryango w’isanamitima.’’

Mbonyingabo Christophe, Umuhuzabikorwa w’umuryango nyarwanda wa Gikristo, ushinzwe isanamitima n’ubwiyunge Christian Action for Reconciliation, and Social Assistance) yavuze ko mu mirenge ibiri yo mu karere ka Kamonyi bakoreramo, bimaze gutanga umusaruro kuri izi mpande ebyeri wabonaga ko zidashobora kongera kubana mu mahoro.

Avuga ko kubasangiza inka, ari cyo gikorwa cy’ingenzi kizafsha aba bantu kuzajya baganira kenshi kandi binateze imbere imiryango yabo.

Rutsinga Jacques, Umuyobozi w’Akarere ka Kamonyi, yavuze ko inzira igihugu cyahisemo yabanisha Abanyarwanda nyuma ya jenoside, ari iyi yonyine y’ubumwe n’ubwiyunge, kubera ko leta yabanjirije iyi yabibye amacakubiri mu Banyarwanda kugeza naho Jenoside yakorewe Abatutsi mu 1994 iba.

Rutsinga Jacques akavuga ko kuba   hari abaturage bamaze kwiyubaka bitanga icyizere ku bandi baturage bari muri ibi byiciro batari batera intambwe nk’iyi yo kwiyubaka.

Umuryango nyarwanda wa gikristo, ushinzwe isanamitima n’ubwiyunge mu karere ka Kamonyi wari usanzwe ukorera imirimo yawo   mu murenge wa Nyamiyaga, na Mugina, ukaba watangije ibikorwa by’isanamitima n’ubwiyunge mu murenge wa Gacurabwenge na Musambira muri iyi miregne yose uko ari ine, umaze guha abaturage bari mu matsinda inka zisaga 100.

MUHIZI ELISEE
UM– USEKE.RW/Kamonyi.