Kacyiru: Umusore yaguye mu mwobo wa 15m ararokoka ntiyanavunika

Gasabo – Ku gicamunsi kuri uyu wa gatatu mu mudugudu w’Urukundo Akagari ka Kibaza mu murenge wa Kacyiru umusore witwa Aime yagize impanuka agwa mu mwobo wa 15m ku bw’amahirwe atangaje ntiyagira icyo aba.

Umwe mu batabaye uyu musore yabwiye Umuseke ko nawe atarasobanukirwa neza iby’iki gitangaza, ngo ni Imana yamurinze.

Uyu musore ngo yari yicaye hejuru y’umwobo uriho imbaho ibiceri yari afite mu mufuka bigwa mu mwobo, maze ngo abaye nk’urungurukamo imbaho zihita zivunika nawe aramanuka nk’uko ngo yabibwiraga abari bamaze kumutabara.

Uyu musore ntacyo yabaye habe no kuvunika, batangaje cyane abamuvanyemo. Ndetse nawe yavugaga ko atumva neza uko byamugendekeye ngo agire aya mahirwe.

Abacukura imyobo bagirwa inama yo kuyifunga neza mu gihe itaruzura kugira ngo idateza impanuka nk’izi kuko amahirwe nk’ayo Aime yagize atabaho kenshi.

UM– USEKE.RW