Kacyiru: Abacuruzi barinubira Amafaranga y’ipatanti yazamuwe

Bamwe mu bacuruzi baciriritse bacururiza mu murenge wa Kacyiru Akarere ka Gasabo barinubira amafaranga y’ipatanti (Petente)yazamuwe akagera ku bihumbi 60 uyu mwaka.

Umwe mu bakora umurimo wo kogosha abantu ati: “mbere twatangaga ibihumbi 40 ku mwaka, ubu batwatse ibihumbi 60, ongeraho umusoro wa 5000F ku kwezi, wongereho 2000 y’isuku n’igihumbi cy’umutekano, nyumvira hafi 70 000F ku mucuruzi nkanjye ubona 2000 ku munsi bigoranye”

Ku bw’uyu mwogoshi, avuga ko niba Leta ishaka ko abantu bakwiteza imbere idakwiye kubaca amafaranga angana gutya itabanje no kureba ayo umucuruzi yinjiza. Avuga ko kuba n’ubu umurenge akoreramo utabemerera gukora amasaha 24 kandi batanga amafaranga y’umutekano ari indi mbogamizi.

Umugore ucuruza ibiribwa n’imbuto ku Kacyiru, we yatangarije UM– USEKE.COM ko  nawe abangamiwe no kuba ubu ari gusabwa amafaranga menshi y’ipatanti. “ Ibi bituma abaturage bumva Leta nabi, inyungu z’igihugu ni inyungu zacu, igihugu gitera imbere ari uko natwe duteye imbere, ntitwarimbere ducibwa aya mafaranga angana gutya kandi nawe urebe ubu bucuruzi bwanjye ayo bwinjiza”

Usibye aya mafaranga y’ipatanti yazamuwe akagera ku 60 000F ku mwaka kuri buri mucuruzi, aba bacuruzi badutangarije ko basabwe kuvangura ibyo bakora mu bucuruzi bw’ibiribwa. Niba ucuruza ibirayi akaba aribyo ucuruza gusa, niba ari umuceri ukaba ari uwo gusa.

Ibi ariko aba bacuruzi ntibabyakiriye neza kuko uyu mudamu ucuruza ibiribwa yagize ati: “ Nunguka amafaranga 5F ku kiro kimwe cy’ibirayi, urumva naziteza imbere ryari aribyo ncuruza gusa? Nzabisorera nkatanga n’iri patanti bazamuye gutya”

Usibye abacururiza ku Kacyiru, UM– USEKE.COM wageze ahitwa mu giporoso i Remera aho abacuruzi baho bavuga ko batazi iby’iri zamuka ry’umusoro w’ipatanti, bityo ko bazatanga ibihumbi 40 000 nk’ibisanzwe.

Umunyamabanga nshingwabikorwa  w’Umurenge wa Kacyiru Vedaste Nsabimana ndetse numugenzuzi w’imisoro Innocent NYAMWASA babwiye UM– USEKE.COM ko iri tegeko rishya ritareba abacuruzi ba Kacyiru gusa, ahubwo rireba abo mu gihugu bose.

Rikaba ari itegeko ryasohotse tariki 1 Mutarama 2012, rikajya hanze tariki ya 15 Mutarama. Iri tegeko ngo rireba umuntu wese wishyura umusoro ku nyongeragaciro (TVA) kuva ku ifaranga 1F kugera ku bihumbi 40 000, ko aba bazajya batanga ibihumbi 60 ubu. Abatarebwa n’umusoro wa TVA bo bakazajya batanga 40 000F nkuko bisanzwe.

Nsabimana Vedaste akaba yavuze ko ubuyobozi bw’Umurenge ayoboye bwahise bufata iyambere mu gusobanurira no kumenyesha abacuruzi bakorera muri Kacyiru iby’iri tegeko rishya. Mu gihe hamwe na hamwe bataramenya iby’iri zamurwa ry’umusoro ku Ipatanti.

Ku kibazo cyo kuvangura ibicuruzwa, Nsabimana akaba yavuze ko iki bashobora kuba bataracyumvise neza, abacuruzi ibyo basabwe ngo ni ukudacuruza inzoga muri boutique bacururizamo n’ibiryo cyangwa n’inyama byose hamwe.

Abacuruzi basanzwe kandi mu murenge wa Kacyiru ngo bashobora gukora amasaha 24/24, ukuyemo abacuruza utubari (Bar), ngo nibo batemerewe gucuruza amanywa n’ijoro.

Kuri iki kibazo ariko Vedaste NSABIMANA akaba yavuze ko abafite umutekano wizewe nka Hotel UMUBANO n’izindi Hotel ziri mu murenge wa Kacyiru ngo zishobora gukora amasaha 24 nta kibazo.

Ririya itegeko rishya ryazamuye ipatanti, ni itegeko numero 59/2011 ryo kuwa 31/12/2011 rishyiraho inkomoko y’imari n’umutungo by’inzego zibanze rikanagena imikireshereze yabyo.

Usibye izamuka rya patente hari imisoro yagabanutse nk’imisoro ku mutungo (Proparty tax / impot immobilier) mbere batangaga 2/1000=0,2% ariko ubu bazatanga 1/1000=0,1%.

Aba motari (Motard)mbere batangaga imisoro y’ibihumbi 4 000frw ariko ubu bazatanga ibihumbi 8 000frw,  imodoka yatangaga 15000Frw y’imisoro ariko ubu bazatanga ibihumbi 40.000frw. Umuntu wese urebwa n’iyi misoro akaba agomba kuyitanga muri Kamena uyu mwaka.

Daddy SADIKI RUBANGURA
UM– USEKE.COM