K8 Kavuyo ntarishyura uwamutsinze mu rukiko, ngo azamurega mu nkiko za USA

Umuhanzi Antoine Mupenzi  yatsinze Muhire William alias K8 Kavuyo mu rw’ubucuruzi rwa Nyarugenge ikirego cy’uko uyu Kavuyo yakoresheje indirimbo « Igishakamba » ya Mupenzi kandi nta burenganzira abifitiye. Urukiko rwaciye uru rubanza mu 2015 rwanzura ko Kavuyo yishyura Mupenzi 6 050 000 Frw hateranyijwe indishyi zose yatsindiwe. Uyu muhanzi ariko ntiyabikoze none Mupenzi ngo ashbora no kwitabaza inkiko z’aho uyu muhanzi aba muri Amerika.

Mupenzi Antoine uririmba indirimbo gakondo yari yareze K8 Kavuyo gukoresha indirimbo ye « Igishakamba » akora indirimbo ye « Acapella » yasohoye mu 2014.

Mu iburanisha, Mupenzi Antoine yasabaga indishyi za miliyoni 38 harimo indishyi zo gukoresha igihangano cye binyuranije n’amategeko, indishyi z’igihembo cy’Avocat , igarama, igihembo cy’umuhesha w’inkiko n’amafaranga y’ikurikiranarubanza.

Aha ngo yari ashingiye ku kuba itegeko riteganya ko indishyi zo gukoresha igihangano cy’undi mu buryo bunyuranije n’amategeko zingana na 30.000.000 frw

Mu kwezi kwa mbere 2015 Urukiko rwaje kwanzura ko K8 Kavuyo atsinzwe rutegeka ko yishyura Mupenzi Antoine miliyoni esheshatu n’ibihumbi mirongo itanu.

Rwanzuye kandi ko ibihangano byose bya MUHIRE William alias K8 KAVUYO bikoreshamo indirimbo“ Igishakamba” biteshejwe agaciro kandi bigomba kuvanwa ku isoko ry’ibihangano n’ahandi hose bigaragara ndetse binumvwa, kuri Radiyo zikorera mu Rwanda no mu Mahanga, Tereviziyo, Imbuga nkoranyambaga, muri za Telephone n’ahandi hose zishobora kumvwa cyangwa kurebwa.

Ariko Kavuyo, utari uhagarariwe mu rubanza, ntiyashyize mu bikorwa uyu mwanzuro w’urukuko.

Mupenzi avuga ko yarategereje agaheba igihe kikaba gishize ari kinini,  avuga ko igihangano cy’umuhanzi kigira ubudahangarwa  kandi kitagira umupaka ko azashaka uko yifashisha n’inkiko z’aho Kavuyo aba muri Amerika akamuregayo.

Mupenzi avuga ko mu buryo bubabaje kuko batanabivuganyeho, K8 Kavuyo yafashe ijwi rye aririmba iyi ndirimbo « Igishakamba » akaritangiza mu ndirimbo ye « Acapella ».

Ati «Kubona umuntu afata ijwi ryanjye atanzi akarishyira mu ndirimbo ye akayishyira hanze igacurangwa ni ikintu kibabaje, ni agasuzuguro karenze rwose.

Kubona murega tukaburana nkamutsinda nkamwoherereza imyanzuro y’urubanza yewe ntanajurire none imyaka ibiri ikaba ishize atanyishyuye .»

Mupenzi avuga ko atazi Kayuvo, ngo ntibarabonana na rimwe amubona ku mashusho gusa.

Ati « Ariko ngomba kwishyuza uburenganzira bwanjye kuko mu gihe umuntu avogereye igihangano cyawe nta burenganzira wamuhaye ugomba kubikurikirana. Kandi sinzacika intege. »

Mupenzi avuga ko kuba iyi ndirimbo yarahagaritswe n’Urukiko ariko igakomeza gucurangwa nabyo ngo azageraho abisabire indishyi kuko ngo atakomeza guceceka.

Josiane UWANYIRIGIRA
UM– USEKE .RW