“Just family ntitwabeshye abakunzi bacu nkuko byanditswe” Bahati

Biherutse kwandikwa ko itsinda Just Family ryabeshye abakunzi baryo ko rifitanye indirimbo rizakorana n’abahanzi bo muri aka karere nka AY, Boby Wine na Keko, ndetse ko rizerekeza mu Ubwongereza.

Umwe mu bagize iri tsinda ry’abasore batatu, witwa Bahati, yatangarije UM– USEKE.COM ko uwanditse iyi nkuru (Eddie Mudenge) atazi icyo yari agamije, akemeza ko inkuru yabanditseho ntaho ihuriye n’ukuri.

Bahati yemeje ko kuba Just Family ifite muri gahunda gukorana indirimbo n’abahanzi nka AY, Keko na Boby Wine atari ibinyoma nkuko byanditswe muri iyo nkuru, ko ahubwo atari ibintu bikorwa ako kanya nkuko uwo munyamakuru yaba yarabitekereje.

Bahati ati: “ Uwanditse iriya nkuru yashatse kudusebya, Indirimbo tuzazikora, abafana bacu ntibakwiye kumva ibiba bivugwa byose, gukorana indirimbo na AY cyangwa Boby Wine ntabwo ari ibintu bikorwa ako kanya ukibitekereza, twamaze kuvugana nabo kandi project yo kizikora nayo igeze kure”

Mu minsi ishize, project yo gukora izi ndirimbo, ndetse n’izindi zose, ngo Just Family yari yarazihagaraitse mu rwego rwo gutegura gushyira ahagaragara Album yabo “Bindimo” nyuma yo kuyishyira kumugaragaro, ubu bakaba bagiye kuyigeza ku banyarwanda badatuye muri Kigali nabo, bityo izo gahunda zindi.

Ku kijyanye no kwerekeza mu gihugu cy’ubwongereza, Bahati ati: “Manager wacu Mutesa Theodomire, aba i Manchester, ari gutegura uburyo twajya gukorerayo ibitaramo kuri Diaspora ibayo, ibi ntabwo ari ibihuha ni impamo, mu ntangiriro z’umwaka utaha twizeye ko bizashoboka”

Inkuru Bahati yemeza ko yari igamije kubasebya, ikaba yarasohotse ku gitangazamakuru cyandika kuri muzika na showbiz mu Rwanda inyarwanda.com kuwa kabiri tariki 6 Ukuboza.

Plaisir Muzogeye
UM– USEKE.COM