Jammeh ngo yateruye miliyoni 11$ mu isanduku ya Leta aragenda

Hari amakuru avuga ko umwe mu bajyanama ba Perezida Adama Barrow yavuze ko barebye mu isanduku ya Leta ya Gambia bagasanga hari amafaranga angana na miliyoni 11$ aburamo, bakemeza ko Yahya Jammeh ariwe wayafasheho impamba mbere y’uko ahungira muri Guinee Equatoriale mu mpere z’iki cyumweru gishize.

Mai Ahmad Fatty yavuze ko ubu bari gukora isuzuma risesuye ngo bamenye neza umubare w’amafaranga yavanywe mu isanduku ya Leta mu buryo budakurije amategeko.

Mu gihe Yahya Jammeh yahungaga ngo hari imidoka zihenze zabonywe n’abantu zimbuka umupaka.

Ngo habonywe kandi izindi zihetse ibikoresho bihenze zizikurikiye.

Kugeza ubu uruhande rwa Jammeh ntacyo ruratangaza ku bibavugwaho.

Mu Murwa mukuru Banjul  ingabo na Police bari gutegura uko Perezida Adama Barrow yagaruka mu mutekano akayobora igihugu mu buryo busesuye.

Ingabo za ECOWAS zaraye zigeze mu murwa mukuru Banjul ngo zifatanye n’iza Gambia gutegura uko Barrow agaruka.

Abaturage bazakiranye ibyishimbo byinshi bazifata nk’abatabazi bababohoje.

Fatty yabwiye abanyamakuru ati: “ Ubu Gambia iri mu kibazo gikomeye cy’amikoro kandi ibi biremezwa na Guverineri wa Banki nkuru y’igihugu ndetse na Minisitiri w’imari”.

Yahya Jammeh yahagrutse muri Banjul mu ijoro ryo kuwa gatandatu ahagana saa yine aherekejwe na Perezida Alpha Conde wa Guinea Conakry.

Agenda yahawe icyubahiro cy’umukuru w’igihugu n’ingabo zimucurangira ndetse aca ku gitambaro gitukura (tapis rouge) nk’uko abanyamakuru bari bahari agenda babyemeza.

Perezida Adama Barrow nawe wemeje ko Jammeh yavuye mu gihugu kandi nawe yiteguye gutaha akava i Dakar agashyiraho Guverinoma ihuriweho na bose.

Abanyamakuru bari biriwe ku kibuga cy’indege bategereje igihe Yahya Jammeh ari buze gusohoka mu gihugu ahunze. Ni nyuma y’uko ubwumvikane bwari bwagezweho kuwa gatanu nijoro hagati ye na ba Perezida Alpha Conde wa Guinea na Abdul Aziz wa Mauritania ngo arekure ubutegetsi ku bushake.

Ntawe uzi neza aho Yahya Jammeh azahagarara, yavuye muri Gambia n’indege ya Mauritania ariko ari kumwe na Perezida Conde.

Biravugwa ko nagera i Conakry ashobora guhira akomeza akerekeza i Malabo muri Guinea Equatorial aho ngo yaba yarahawe ikaze na Perezida Teodoro Obiang Nguema Mbasogo uri ku butegetsi kuva mu 1979.

Jean Pierre NIZEYIMANA
UM– USEKE.RW