Ishyingurwa rya Amy Winehouse se ati: “Ijoro ryiza mukobwa wanjye”

Kuri uyu wa gatatu nibwo habaye umuhango wo gushyingura umuririmbyi Amy Winehouse uherutse kwitaba Imana. Ise Mitch Winehouse yagize ati: “Ijoro ryiza mukobw awanjye. Sinzira neza”

Mu muhango witabiriwe n’abantu bagera ku 150 mu majyaruguru ya London, wakozwe mu muco w’abayahudi ari nawo umuryango wa Mitch Winehouse ubarizwamo.

Ise yavuze ko Amy mu minsi ye yanyuma yamubwiye ko yishimye cyane, ko amerewe neza kurusha mbere.

Uyu muhango witabiriwe n’abaririmbyi nka Bryan Adams,  Mark Ronson, abaririmbyi be, abamucurangiraga, abamwambikaga n’izindi nshuti ndetse na Reg Traviss byavugwaga ko bari kumwe muri iyi minsi.

Blake Fielder wahoze ari umugabo wa Amy Winehouse ntabwo yitabiriye gushyingura Amy, biravugwa ko yimwe uruhusa rwo gusohoka aho afungiye muri Prison ya Armley i Leeds, kubera ibyaha bitandukanye birimo no gufatanwa ibiyobyabwenge.

Inshuti ze nke nazo zatanze ubuhamya bugufi kuri Amy, muri uyu muhango wamaze iminota igera kuri 45,  bose bahuriza ku kintu kimwe ko Amy yoroshyaga ibintu, kandi yakundaga ibyishimo.

Photos Internet

JP Gashumba
Umuseke.com