Inka si iy’amata n’akaboga gusa bamwe irabaha amashanyarazi

Ni ibisanzwe ko inka ntakizivaho gipfa ubusa, zikamwa amata, amase agatanga ifunmbire, impu zigakorwamo imyenda, ibinono bigakorwamo ibifungo (ibipesu), inyama ubwo zariwe, amahembe nayo ubu akorwamo ibyo bipesu nubwo kera bayabikagamo ifaranga.

Ubu nyuma y’iyi mimaro myinshi y’Inka, abinkwakuzi bo mu byaro iranabacanira amashanyarazi, ikanabatekera badakoresheje inkwi, bakoresheje Biogaz itangwa n’amase n’amaganga by’inka.

Abatunze inka bitabiriye imishinga ya Biogaz bemeza ko gutunga inka zigeze kuri ebyiri cyangwa se zirenze, ntuzibyaze ingufu ari igihombo muri iki gihe.

Abitabiriye imishinga ya Biogaz ubu bakaba bashobora gutegura amafunguro batagombye kwifashisha ibikomoka ku biti, ndetse babasha no kubonesha nijoro nk’aho bakoresha umuriro w’amashanyarazi.

RUHANGARA Enock, umuturage utuye mu murenge wa Busasamana mu karere ka Nyanza, ubu akoresha Biogaz iva mu ngufu z’amase y’inka enye atunze. Yatangarije UM– USEKE.COM ko mu gihe kingana n’amezi atandatu akoresha biogaz mu gutegura amafunguro, atagikeneye gukoresha inkwi ukundi.

Uretse gukoresha inkwi kandi,aho atuye mu giturage si ngombwa ko nijoro abonesha  mu nzu akoresheje peteroli. RUHANGARA ati:″ Inkwi ubu ni amateka, mu gikoni harangwa ni isuku kandi nta myotsiiharangwa. Ikindi kandi yamase twakoresheje mu gukora Biogas, arongera agasohokamo tukayafumbiza. Ntako bias mu by’ukuri″

MUKAGASHUGI, umufasha wa RUHANGARA Enock, avuga ubusanzwe bakoreshaga nibura imiba y’inkwi itatu mu cyumweru,mu guteka. Kandi nazo zikaboneka bigoranye kubera ko amashyamba agenda agabanuka. MUKAGASHUGI akagira ati:″ubu si ngihangayika ngo nabuze inkwi cyangwa se ngo imvura irazinyagira. Ndaza ngafungura ngahita nteka.″

Mu gukangurira aborozi b’inka gukoresha Biogaz, intego ngo ni ukugabanya ibicanwa bikomoka ku biti. — USENGIMANA Phiribert, ashinzwe amashyamba mu karere ka Nyanza nawe asanga abatunze inka bagakwiye no kugira Biogaz.

Agira ati:″abafite inka bagakwiye kugira biogaz, ariya mase agenda atakara apfa ubusa,bakayabyaza umusaruro. Iyo biogaz izabafasha kubona yafumbire, inka nazo zibe ziri hariya zitanga umukamo kandi banarondereze ibicanwa kuko nabyo bihenze.″

Mu gihe hagenda hashakishwa uburyo bunyuranye bushobora kubyara ingufu, abaturage ubu bakoresha ingufu zikomoka ku mashanyarazi bakaba bamaze kugera kuri 14 ku ijana.

NGENZI Thomas
UM– USEKE.COM