Ingabo za RDF ziteguye gusarura hafi toni 2 000 z’ibigori i Gabiro

Umusaruro w’ibigori byahinzwe n’abasirikare ba RDF i Gabiro mu karere ka Nyagatare, uratanga ikizere ku gihugu cyo gusagurira amasoko, nyuma yo guhunika mu kigega cy’Igihugu cy’ibiribwa (Food Security Reserves) nk’uko bitangazwa na Ministeri y’ingabo.

Minisitiri w’ubuhinzi, n’ubworozi Agnes Karibata ari kumwe na Minisitiri w’Ingabo, Gen James Kabarebe batangije kuri iki cyumweru igikorwa cyo gusarura ibyo bigori Ingabo z’u Rwanda, umutwe wa Reserve Force, bahinze ku buso bwa ha 664 bigaha akazi abaturage bagera hafi ku bihumbi bibiri aho i Gabiro. Hitezwe gusarura toni hafi 2 000 by’ibigori.

Minisitiri w’Ubuhinzi n’ubworozi yavuze ko umusaruro w’ibigori abasirikare bejeje muri aka karere ari urugero rufatika rw’uko ubuhinzi bukorerwa muri aka gace bwabasha guteza imbere igihugu mu kwihaza mu biribwa no gusagurira amasoko yo hanze y’u Rwanda.

Minisitiri ati” Aha hantu hafite ubushobozi bwo kugaburira igihugu kandi bigeze kure tuzabigeraho”.

Minisitiri Kalibata yavuze ko ikibazo cyo kubona amazi yo kuhira ibihingwa gikunze kugaragara muri aka gace nacyo Guverinoma izakibonera umuti mu gihe cya vuba kuko hateganijwe gukora imiyoboro y’amazi( irrigation) mu mirima hifashishijwe amazi y’Akagera ku buryo guhinga buhirira imyaka bizoroha, bityo umusaruro muri aka gace ukazarushaho kwiyongera.

Minisitiri w’Ingabo, Gen James Kabarebe yasabye Minisiteri y’ubuhinzi n’ubworozi kunganira ku mashini zizafasha gusarura ibigori abasirikare bahinze kugira ngo bisarurwe vuba imvura itaragwa ngo ibyangize.

Ndetse hari n’inkunga mu bya tekinike, nko kumisha ibigori, kutoranyamo ibyaba imbuto n’ibyajya ku isoko n’ibyahunikwa.

Minisiteri y’ubuhinzi n’ubworozi yijeje ubufatanye muri ibi bikorwa ndetse yanasezeranye ko uyu musaruro w’ibigori uzagurwa ukajya mu buhunikiro bw’igihugu.

Umuvugizi w’Ingabo z’u Rwanda, Brig Gen Joseph Nzabamwita yasobanuye ko ingabo z’u Rwanda nyuma yo guha umutekano abanyarwanda zifite n’inshingano yo gufatanya n’abaturage guteza imbere igihugu.

Ati “ U Rwanda rufite umutekano uhagije, icyo twibandaho cyane muri iki gihe ni umutekano urambye w’abaturage ukubiyemo kurwanya inzara, kwihaza mu biribwa, ubu niho tugeze, aho turi dutoza abaturage umuco wo gukora kugira ngo twihaze”.

By’umwihariko kuri ubu butaka bw’ingabo z’igihugu buri Gabiro mu ihinga ritaha yavuze ko hazahingwa ho ha 300 z’ibishyimbo hanyuma mw’isizeni (saison) ya 2015A hagahingwa ha 1343.

Harateganywa kuzifashisha amamashine ahinga na kajugujugu mu kubagara no gufumbira imyaka kugira ngo umusaruro urusheho kuba mwiza.

Uretse ibikorwa byo guhinga i Gabiro yavuze ko RDF ifite indi mishinga y’iterambere, imwe muri iyo n’ ubuhinzi bw’imyumbati mu karere ka Bugesera ku butaka bw’ikigo cya gisirikare cya Gako, ahava umusaruro mwinshi woherezwa mu ruganda rw’imyumbati rwa Kinazi.

Hari umushinga w’ubworozi bw’inka i Songa ndetse n’ikaragiro ry’amata riri i Nyanza, hakaba n’ubworozi bw’ingurube mu karere ka Kicukiro, ingabo z’igihugu zikaba ziteganya guhaza isoko ry’inyama z’ingurube zikanoherezwa ku masoko yo hanze.

MoD

ububiko.umusekehost.com