Imyigaragambyo mu Nteko ya USA Abadepite bicaye hasi banga gutaha
Bagenzi babo b’abaRepublicains babinginze ngo bahaguruke batahe biba iby’ubusa
Inteko Ishinga Amategeko ya Leta zunze ubumwe za Amerika isa n’iyacitsemo kabiri, Abadepite bo mu ishyaka ry’aba Democrates banze kuva mu nteko bicara hasi bavuga ko batava mu Nteko itegeko ryo kugenzura intwaro mu baturage ridatowe.
Byahereye kuwa gatatu ahagana saa sita z’amanywa, Abademocrates basaba abo ku ruhande rw’abaRepublicains gutora itegeko ribuza icuruzwa ry’intwaro muri rubanda runaka.
Byaranze, aba badepite biyemeza ko batava mu Nteko ridatowe ndetse bicara hasi. Bamwe bazanye amafoto y’ubwicanyi butandukanye bwakozwe n’abaturage bitwaje intwaro ahanyuranye muri USA mu bihe bya vuba bishize.
Bigeze saa yine z’ijoro aba badepite bacecekesheje umuyobozi wabo washakaga ko batuza bagataha bakazakomeza ibiganiro kuri uyu wa kane, abandi baranze nk’uko bitangazwa na televiziyo ya NBC.
Abadepite b’AbaDemocrates bagumye mu Nteko biyemeza ko basohoka itegeko ritowe, kandi nta kindi gikorwa mu Nteko iri tegeko ridatowe. Bagenzi babo bo muri Sena batangiye kuza kubashyigikira kuri uyu wa kane mu rukerera.
Ubusanzwe abaRepublicains nibo benshi mu Nteko, ahagana saa munani z’ijoro bagerageje guhura ngo barebe uko iki kibazo cyakemuka, ariko bagenzi babo bakoza gusakabaka bati “No bill no break”.
Kugeza saa kumi za mugitondo kuri uyu wa kane, aba badepite bari bakicaye hasi mu Nteko nta gahunda yo guhaguruka, bagenzi babo b’abaRepublicains batashye.
Hanze abantu benshi bari kubashyigikira, ku mbuga nkoranyambaga ibyamamare bimwe byatangiye kubashyigikira mu ntero ivuga ngo #NoBillNoBreak.
UM– USEKE.RW
English