Impushya zo gutwara ibinyabiziga zigiye kujya zisohoka mu minsi 14

Ishami rya Polisi y’Igihugu rishinzwe umutekano wo mu muhanda ryatangaje ko  igihe cyo gusohora impushya  zo gutwara ibinyabiziga ku bazitsindiye cyagabanutse.

Iri shami rivuga ko igihe cyo kuzikora no kuzisohora  kigiye kugabanuka, abantu bakajya bazibona mu gihe cy’ibyumweru bibiri nyuma yo gutsinda ibizamini bitangwa n’iri shami.

Chief Supt Bahizi Felly, Umuyobozi wa Polisi mu ishami rishinzwe umutekano wo mu muhanda avuga ko mu bisanzwe gukora izi mpushya no kuzisohora byafataga hagati y’amezi abiri n’ atatu, gusa avuga ko kuri ubu bigiye kujya bifata iminsi 14 gusa.

Agira ati:”ku muntu uzaba ufite ibyagombwa byose n’ukuvuga amazina na nimero z’indangamuntu byanditse neza, azajya ayibona mu gihe cy’ibyumweru bibiri”.

CSP. Bahizi akomeza avuga ko ikibazo cyari gihari cyanatumaga izi mpushya zitinda ari uko hakundaga kugaragara amakosa atandukanye cyane cyane kuri  nimero z’indangamuntu n’amazina byabaga byanditse nabi,  ibi byose bigasaba ko babanza kuvugana n’ikigo cy’igihugu gishinzwe indangamuntu bityo ikorwa ryazo ritinda.

Ati:”Ivugurura ririmo gukorwa, n’uburyo bushya bwo gukora izi mpushya na bwo burahari, kuko ubu dufite uburyo bushya buzajya bubasha kubona amakosa mbere y’uko twitabaza Ikigo cy”Igihugu gishinzwe indangamuntu, ibi rero bizagabanya igihe, zijye ziboneka mu minsi 14.

Polisi y’Igihugu kandi yongereye umubare w’abapolisi bafite ubumenyimu ikorwa ry’impushya zo gutwara ibinyabiziga  n’abazajya bakurikirana uko ibizamini bikorwa, ubu ibizamini bizajya bikorwa Intara imwe ku yindi, intara nizirangira hakurikireho Umujyi wa Kigali.

UM– USEKE.RW