IMPINDUKA: Bugesera FC izakirira Rayon Sports i Nyamirambo

Updates 5PM: Umukino wa Bugesera FC na Rayon Sports uzabera kuri Stade ya Kigali i Nyamirambo kuwa gatatu aho kuba kuri Stade Amahoro kuwa kabiri nk’uko byari byatangajwe mbere, ubuyobozi bw’ikipe ya Bugesera bwabwiye Umuseke ko izi mpinduka bazimenyeshejwe nyuma na FERWAFA ibabwiye ko ikibuga cya Stade Amahoro kigengwa na Minisiteri kitakibonetse kuri uyu wa kabiri kubera ibikorwa bindi biyiberamo.

Umukino Bugesera FC yagombaga kwakiramo Rayon Sports i Nyamata, FERWAFA yari yasabye ko wimurirwa kuri stade Amahoro kuko ngo ikibuga cya Bugesera kitashobora kwakira abafana benshi.

Umukino wo ku munsi wa 23 wa shampiyona, wagombaga kubera i Nyamata uguhuza Bugesera FC na Rayon sports, wimuriwe kuri ya Kigali i Nyamirambo kuwa gatatu saa cyenda n’igice.

Nk’uko Umuseke wabitangarijwe n’umunyamabanga wa Bugesera FC Mbonigaba Silas, ngo FERWAFA niyo yabasabye kwimurira uyu mukino i Kigali, ngo kuko kuko gucunga umutekano w’abafana benshi ku kibuga cya Bugesera bigorana.

“Imikino tumaze iminsi twakira yaduhaye isomo. Umukino twakiriye mo Mukura, abafana binjiye mu mu kibuga, FERWAFA yashoboraga kuduhana, igahagarika ikibuga cyacu kubera ibibazo by’umutekano mucye, ariko twasabye imbabazi.

Kwakira abafana ba Rayon sports rero byo birumvikana ko bitari gushoboka ku kibuga cyacu, kitazitiye. FERWAFA yadusabye ko twayakirira i Kigali.” – umunyamabanga wa Bugesera FC, Mbonigaba Silas

Uyu munyamabanga ahakana ko atari ikibazo cyo gushaka agafaranga kuri Rayon Sports izwiho kugira abafana benshi bikaba byiza ku ikipe yakiriye, ahubwo avuga ko ari na byiza kwakirira i Kigali kuko ngo hari n’abanya-Bugesera batuye mu mugi wa Kigali, baba bifuza kubona ikipe yabo.

Kwinjira kuri uyu mukino ni 1 000 mu myanya isanzwe, 2 000 ahatwikiriye, bitanu mu myanya y’icyubahiro na 10 000 mu byubahiro bikomeye (VVIP)

Imikino itatu yakinwe guhera saa 18h muri shampiyona y’uyu mwaka yose yari iya Rayon Sports kandi yarayitsinze (yatsinze Kiyovu 2-0, itsinda Police FC 3-1, itsinda APR FC 4-0).

Ibindi…

Tariki 27/03/2013 nibwo Bugesera FC iheruka gutsinda na Rayon sports kuri stade Amahoro. Hari hashize igihe gito (iminsi 18) Rayon Sports inyagiye  APR FC 4-0.

Icyo nicyo gihe hishwe inkoko umufana wa Bugesera yari yazanye kuri stade, bazikekaho kuba uburozi. Byatumye Bugesera itangira kwitwa ‘Team ya Masake’

Umukino warangiye Bugesera itsinze Rayon 2-1 bya Ndahinduka Michel (ubu uri muri APR FC) na Gafishi Innocent. Impozamarira ya Rayon yatsinzwe na Papy Kamanzi.

Roben NGABO
UM– USEKE.RW