Impano yo kubyina yarinda urubyiruko kwishora mu biyobyabwenge
Ababyeyi barasabwa gushyigikira abana babo mu mpano zinyuranye bafite ngo kuko baramutse bazikoresheje neza zishobora kubarinda kwishora mu biyobyabwenge, ibi byagarutsweho mu gikorwa cy’ubukangurambaga bugamije kurwanya ibiyobyabwenge mu rubyiruko cyateguwe na PSI Rwanda kuri uyu wa gatanu tariki ya 27 Kamena kuri Maison de Jeunes Kimisagara.
Imbaga y’urubyiruko rw’abanyeshuri biga mu mashuri abanza n’ayisumbuye bari baje kumva ubutumwa butangirwa muri iyi myidagaduro.
Mukeshimana Seraphine, umukozi ushinzwe ubukangurambaga bugamije kurwanya icyorezo cya SIDA mu kigo cy’urubyiruko cya Kimisagara avuga ko iki gikorwa cya PSI cyateguwe mu rwego rwo gukoresha imbyino nk’imwe mu mpano z’urubyiruko zakwifashihswa kurwanya ibiyobyabwenge.
Seraphine asaba ababyeyi ko badakwiye gupfukirana impano urubyiruko rufite ahubwo ngo bagomba kubaba hafi kuko izo mpano zabafasha mu buzima busanzwe.
Yagize ati “Kubyina bishobora gufasha umuntu gutera imbere ndetse byamuhuza bikamurinda ibiyobyabwenge n’ingeso mbi. Umwana agomba gukurira mu mpano afite, ababyeyi bakamufasha ntibayipfukirane.”
Umuhanzi Queen Cha, ubundi witwa Mugemana Yvonne nk’umwe mu bamaze kumenyekana mu Rwanda akaba yifashishijwe na PSI Rwanda mu kwigisha urubyiruko yatangarije Umuseke ko iki gikorwa ari cyiza.
Yagize ati “Iki gikorwa ni cyiza cyane, urubyiruko rukeneye abantu baruba hafi bakarugira inama cyane ku bijyanye no kwirinda ibiyobyabwenge.”
Mugemana yavuze kandi ko afite gahunda zo kuririmba indirimbo zitanga inama ku rubyiruko ndetse ngo hari iri muri studio, kandi ngo indirimbo ye yitwa ‘Kizimyamwoto’ mu misni mike iraba ifite amashusho.
Queen Cha ngo yumva ababyeyi bagomba kuba hafi y’abana babo ngo kuko kubaba hafi byatuma bamenya amabanga menshi bafite bakabasha kubaha inama.
Muri iki gikorwa harimo n’uhagarariye Polisi y’u Rwanda, AIP Alexandre Minani wasobanuriye urubyiruko ibiyobyabwenge icyo aricyo, ingaruka zabyo n’ibihano bifatirwa ababicuruza n’ababishoramo abana.
Ishimwe Shema w’imyaka 16, akuriye Club ishinzwe kurwanya ibiyobyabwenge aho yiga mu Rwunge rw’amashuri rwa Kimisagara, GS.Kimisagara, avuga ko ibiyobyabwenge ari bibi kandi bisenya igihugu ikaba ariyo myamvu abirwanya.
Yagize ati “Ibiyobyabwenge numva ko byangiza igihugu cyacu kandi umwana ubunyoye ababaza ababyeyi. Bishobora gukururira abana mu ngeso mbi z’ubusambanyi.”
HATANGIMANA Ange Eric
ububiko.umusekehost.com
0 Comment
Rollers inkweto z’amapine barikoresha bambaye ibibarinda impanuka (protection) byibuze gants, casques na protection zo ku mavi, si byiza kubyerekana kuliya ku mwana encore muli piblic nta protection, bazabikosore ubutaha !
Comments are closed.