Imishinga n’ubushakatsi bwaheraga mu mpapuro byabonewe inkunga

Leta y’u Rwanda ku bufatanye na komisiyo y’ubukungu y’umuryango w’abibumbye muri Afurika, kuri uyu wakane tariki 05 Mata yatangije ikigega kizajya gifasha abashakashatsi ndetse n’abandi bahanga imirimo ibyara inyungu kuyibyaza umusaruro.

Iki kigega gifite ku ntangiriro miliyoni 400 z’amadorari y’abanyamerika kikazajya gishyigikira Ubushakashatsi ndetse n’imishinga igaragaramo ikoranabuhanga mu kuyibyaza umusaruro.

Imishinga yo guteza ubuhinzi imbere,inganda hamwe n’ubumenyi n’ikoranabuhanga,nizo nzego ikigega kizashyikira mu ntangiriro.Dr.Vincent Biruta,minisitiri w’uburezi yerekana umumaro wacyo, yemeza ko kizafasha kubyaza umusaruro ubushakashatsi bwakorwaga, ariko bugahera mu mpapuro.

Dr Vincent Biruta avuga ko abanyeshuri bo mu mashuri makuru na kaminuza bakora ubushakashatsi, ari uburyo bwiza bwo kwifashisha iki kigega.

Biruta ati:″Ubushakashatsi bukorwa mu mashuri makuru bwari bukwiye kuganisha ku mishinga ifatika,ishobora gutuma bibaviramo imirimo,batagiye kwirirwa bashakisha ngo barabona akazi hehe?″

Faustin Mbundu, uhagarariye urugaga rw’abikorera ku giti cyabo, avuga ikigega nk’iki ari uburyo bwo bwo kongera umusaruro ku bikomoka mu Rwanda no guhangana ku isoko n’ibihugu byo mu karere.

Mbundu ati:″kizongera Kizarushaho gushakashaka ibintu twakorera mu Rwanda bihendutse,ariko byiza.Bishobora guhangana ku isoko ryo mu karere,no hirya yako.″

Uretse miliyoni 400 z’amadorari y’abanyamerika Ikigega kitangiranye, zikazanagenda ziyongera, uko ubushakashatsi ndetse n’imirimo ibyara inyungu,bizarushaho kwiyongera.

NGENZI Thomas
UM– USEKE.COM