Imibereho y’indaya ishaje yo muri Kigali

Uburaya mu Mujyi wa Kigali bugenda bwivigurura haza abakobwa bashya uko abandi bagenda basaza. Uru ruhererekane rugaragaza ko uburaya butazashira i Kigali kimwe n’ahandei. Ese ubundi buva he? I Kigali imwe mu ndaya zishaje yaganiriye n’Umuseke.com ku buzima bwazo inatubwira uko uburaya bwivugurura.

Ubusanzwe ngo udukobwa tw’utwangavu n’abakobwa b’inkumi nibo abakiliya baza bashaka, aba bakiliya ngo biganjemo abagabo n’abasore bagimbutse, aba baba bashakishwa barangwa n’indaya nkuru (nabo ngo babonamo akantu), babura bikaba ngombwa ko bagura uwo usaziye mukazi uba uri hafi kandi wa macye.

Mu kiganiro n’iyi ndaya yo mu kigero cy’imyaka irenga 40 iba mu Murenge wa Remera aho bita mu Migina, yadutangarije iyo amaze kuva ku isoko nta bakiriya benshi akibona amanuka akajya gutura mu mazu akodeshwa 5 000Frw ku kwezi aherereye hafi y’akabande gatandukanya Remera na Nyarutarama.

Ati “ Biba bigoye ariko abo bana bashya mu mwuga nibo natwe turiraho. Umurangira uwahoze ari umukiliya wawe, akaguha akantu n’umukobwa nawe akaguha akantu ubuzima bugakomeza.”

Abo bana b’abakobwa bashya ngo ni abaturuka mu byaro bahamagawe n’aba baba bamenyereye “amaseta” ngo baze babereke uko bashaka amafaranga muri Kigali, abenshi ngo ntibaba bazi akazi kabazanye kubera ingorane bahura nazo bakigera i Kigali bikaba ngombwa ko bakora ibyo bazaniwe kabone nubwo baba batabishaka ariko ngo nyuma y’igihe gito baramenyera nkuko uyu mugore uvuga ko kuva Genocide yarangira yari i kigali yicuruza.

Uyu mugore ubyaye kabiri avuga ko hari bagenzi be bafite abana bakuru cyane (kuko baba barabyaye ari bato) barimo n’ababa bari ku isoko nabo. Tumubajije niba nawe afite abakobwa ariraho ati “ Ndabafite benshi niba ushaka umwana ucyeye umbwire. Kandi nta gihendo na bitanu uramubona ariko nanjye umbariremo.”

Uyu mugore ariko yaduhakaniye ko muri ibyo akora hatarimo gucuruza urumogi dore ko narwo ruvugwa muri aba bakora ako kazi. Ati ” Urumogi oya, ntarwo ducuruza pe! ni ukwigurisha gusa nagira amahirwe nkabona nanjye uwo turyamana akanyishyura biba ari ibyo.”

Ku ndaya ishaje nkawe, ibiciro ngo biterwa n’umukiliya uko agaragara, ariko ngo ntabwo we ajya munsi y’igihumbi cy’amanyarwanda, ariko iyo abonye uhagaze neza ngo ntatinya kuguca na bitanu cyangwa 10. Bigaterwa kandi n’igihe mumarana, niba urara iwe cyangwa umujyana iwawe, mbese byose ngo ni ubwumvikane cyane cyane.

Ku myaka irenga 40, uyu mugore avuga ko atazi niba yabasha kureka kuko ngo ntakandi kazi yigeze akora kuva yaba we. Ati ” cyakora yenda bampaye nk’amafaranga afatika ngo ntangire nk’ubucuruzi nabivamo yenda kuko njya numva ngo hari abandi babiretse, ariko ko ntawe duturanye ndabona areka uburaya ra?.”

Impungenge ku gihugu

Ku muryango nyarwanda, igiteye ubwoba ni urwo ruhererekane rw’indaya zishaje zizana abana b’abakobwa zibavanye mu byaro bagata amashuri n’imiryango ngo baze gukorera amafaranga bacuruza imibiri yabo.

Inzego zinyuranye cyane cyane izifite abari n’abategarugori mu nshingano zikwiye guhagurukira gukumira uru ruhererekane rw’indaya zishaje ziriho zizana abana bo kuzisimbura.

Izo nzego zikwiye gufata ingamba zo gukumira icyo kintu haherewe kuri abo bana bava mu byaro cyangwa se izo ndaya zishaje zibazana.

Ababishinzwe bagire icyo bakora kuko usibye kuba bakora akazi kadakwiye ababikora bavaniramo ubwandu bw’indwara nka SIDA, ubwo bwandu bukwirakwizwa muri ba bakiliya barimo abafite ingo n’abakibyiruka, ugasanga bavuga ngo umubare w’abanduye SIDA muri Kigali uri hejuru kuruta ahandi.

Abo banyakigali nibajya mu byaro, ni ukwitegura inkuru zindi zizaba zivuga ko umubare w’abanduye SIDA no mu byaro wazamutse.

Roger Marc Rutindukanamurego
UM– USEKE.COM