Imanza z’abarwayi, abashaje, abana, abagore batwite…zigiye kuburanishwa vuba

Mu kiganiro n’abanyamakuru  Minisitiri w’ubutabera akaba n’intumwa nkuru ya leta Johnston Busingye avuga ko mu cyumweru cyahariwe ubufasha mu by’amategeko (Legal Aid Week) bazaburanisha imanza z’ibyiciro byihariye birimo iz’imfungwa n’abagororwa  barwaye indwara zidakira, abageze mu zabukuru,abagore batwite, abonsa ndetse n’abana.

Muri iki kiganiro n’abanyamakuru Minisitiri w’ubutabera akaba n’intumwa nkuru ya leta Johnston Busingye yagarutse ku  manza nyinshi leta y’u Rwanda yari ifite zirimo umubare munini w’abagize  uruhare muri Jenoside yakorewe abatutsi mu Rwanda, avuga ko inkiko  zo mu Rwanda zitari gushobora kuziburanisha mu gihe gito, ku buryo byabaye ngombwa ko hashyirwaho n’izindi nzego zitandukanye zunganira inkiko  kugira ngo  izi manza ziburanishwe.

Minisitiri Busingye akavuga ko  hagiyeho Inkiko gacaca,  Abunzi n’abashinzwe ubufasha mu by’amategeko muri buri karere(MAJ) ku buryo ngo izi nzego zose zafashije abaturage ku bijyanye n’ubutabera.

Uyu muyobozi avuga ko muri iki cyumweru cyahariwe ubufasha mu by’amategeko, bagiye gukora ubuvugizi mu nkiko  z’u Rwanda  kugirango zihitishe imanza z’ibi byiciro bitandukanye cyane cyane biriya byiciro byihariye.

Minisitiri Busingye ati “Hari abantu bagomba guhabwa ubutabera bwihuse dushingiye ku bibazo bafite.”

Odette Yankurije umuyobozi  muri Minisiteri y’ubutabera ushinzwe  kugeza ubutabera  ku baturage avuga  ko  imanza z’abana ari zo bari basanzwe baburanisha mu byiciro byihariye, ariko ngo ubu bagerageje kuzigabanya ku buryo muri iki cyumweru bifuza kuburansiha nka 30.

Icyumweru cyahariwe  ubufasha mu by’amategeko ku rwego rw’igihugu kizabera mu karere ka Gisagara taliki  09 Gicurasi  gikomereze  no mu tundi turere tw’igihugu.

Minisiteri y’ubutabera  ivuga ko  dosiye  120 arizo ziteganyijwe kuburanisha muri iki cyumweru cyahariwe ubufasha mu by’amategeko.

Imanza z’imitungo  yangijwe muri jenoside yakorewe abatutsi mu 1994 zingana na 5%  nizo zitari zaburanishwa kugeza ubu.

MUHIZI ELISEE
UM– USEKE.RW/Kigali