Ikipe ya nyuma muri Shampiyona y’abagore yahawe imyambaro

Ikipe y’abagore ya Don Bosco Gatenga ubu iri ku mwanya wa nyuma mu itsinda A muri shampionat y’abagore, nyuma yo guhabwa imyambaro yo gukinana ngo birabatera akanyabugabo barebe ko bava kuri uwo mwanya mubi.

Don Bosco Gatenga yakiriye impano y’imyambaro yahawe n’ubuyobozi bw’urubuga rwa Sokkaa.com mu cyumweru gishize.

Fred Mandela utoza iyi kipe muri Centre de Jeune Don Bosco mu Gatenga avuga ko bari ku mwanya wa nyuma kuko abakinnyi hafi bose atoza ari bashya.

Ati “ Ubu tubonye bimwe mu bikoreshe nkenerwa twiteguye kuva kuri uyu mwanya tukaba twanagera imbere y’izindi.”

Uwase Nadine umunyezamu w’iyi kipe, amaze imyaka ine akina ruhago, afite inzozi ko umupira akina uzamutunga kuko akiri muto (imyaka 20) kandi yiyumvamo impano.

Thom Harvey umuyobozi wa Sokkaa.com avuga ko bateye inkunga bashoboye iyi kipe kugirango bigire icyo biyifasha mu mikino ikina.

Sokkaa.com yandika amakuru y’imikino mu ndimi zirimo n’ikinyarwanda, rwatangiye gukora mu ntangiriro z’uku kwezi kwa gatatu dusoza.

Ikipe ya Don Bosco Gatenga ntabwo iheruka gutsinda mu mikino ine iheruka gukina. Mu ntangiriro z’uyu mwaka ikipe ya Don Bosco Gatenga yatsinzwe bikomeye na AS Kigali ibitego 8 – 0.

BIRORI Eric
ububiko.umusekehost.com