Icyegeranyo ku mibereho y’abaturage kuva mu 2005 kugeza 2010 cyasohotse

Kigali –   Ministeri y’Ubuzima yashyize ahagaragara imibare ku gipimo cy’imibereho y’abaturage kuva mu mwaka wa 2005 kugeza mu 2010.

Iki cyegeranyo kivuga ko muri icyo gihe ku bana 1000 bavukaga abapfaga bataragera ku mwaka umwe bangana na 50 ku 1000, naho abapfa batarageza ku myaka itanu  bagera kuri 76/1000.

Dr Ngabo Fidele  ushinzwe ubuzima bw’umubyeyi n’umwana  yatangaje ko imfu z’abana bataragera ku myaka itanu, ndetse n’ababyeyi byagabanutse ku buryo bushimishije kuva mu 2005.

Impfu z’abana n’abana bikaba byaragabanutse biturutse kuri gahunda zo kuringaniza imbyaro, ibi ngo byatumye ababyeyi bagira ubuzima bwiza. Kugeza mu mwaka wa 2010 abagore 45% bakoreshaga bumwe mu buryo bwo kuringaniza imbyaro nkuko iki cyegeranyo cyabigaragaje.

Kugirango ubukungu bw’igihugu bubashe kugendana n’umubare w’abaturage birasaba ko byibura abagore 70% bakoresha uburyo bumwe mu butandukanye bwo kuringaniza imbyaro.

Mu 2005 abaturage bararaga mu nzitiramubu bangana na 18%, kugeza mu 2010 abagera kuri 83%.

Kuva mu 2005 abanduye agakoko gatera SIDA bagera kuri 3% babonye imiti igabanya ubukana, ibi ngo byatumye abicwa n’icyorezo cya SIDA bagabanuka ku buryo bugaragara kuva mu 2005.

Ministre w’Ubuzima Dr Agnes Binagwaho yavuze ko kugabanuka kw’impfu z’abana n’ababyeyi bigaragaza iterambere mu mibereho y’abanyarwanda rigendanye n’iterambere ry’ubukungu bw’igihugu hakurikijwe intego z’ikinyagihumbi n’icyerekezo 2020 u Rwanda rwihaye.

Daddy SADIKI RUBANGURA
UM– USEKE.COM