Ibi bibazo bingeraho n’ibindi kuki bidakemuka? – P.Kagame abwira aba Matimba

Mu ijambo yagejeje ku baturage b’Akarere ka Nyagatare mu murenge wa Matimba mu kagari ka Kagitumba Perezida Paul Kagame yibanze ku iterambere ry’imibereho y’abaturage avuga ko aho u Rwanda rwavuye n’aho rugeze ubu hashimishije, ariko ko rushaka kugera heza kurushaho kandi nta muturage usigaye inyuma asabiriza kubera ubukene. Yanenze abayobozi b’inzego z’ibanze kudakemura bimwe mu bibazo by’abaturage kandi bidakomeye kugeza ubwo barinda kubimugezaho abasuye.

Yari amaze gusura umupaka uvuguruye wa Kagitumba (One Stop Border Post) maze agirana ikiganiro n’abaturage. Ni mu rugendo arimo mu karere ka Nyagatare kuri uyu wa mbere.

Perezida Kagame yabwiye abaturage ko nta ukwiye gukora ibirometero byinshi ashaka serivisi z’ubuzima cyangwa uburezi, avuga ko yifuza ko serivisi z’imibereho nk’ubuhinzi, uburezi, ubworozi n’ibindi zegera abaturage kugira ngo biteze imbere.

Ati “ Ntabwo dushaka kuba mu bukene. Icyo duharanira ni iterambere, ntidushaka ko hari usigara inyuma, ntidushaka ko hari umuntu uba ku muhanda asabiriza kubera ubukene, ndabasaba uruhare rwa buri wese cyane cyane byubakira ku myumvire myiza, sibyo?”

Yongeyeho ati “Imyaka tumaze n’aho tuvuye n’aho tugeze umntu yavuga ko bishimihije, ariko ntitwavuga twageze aho dushaka.”

Perezida Kagame yabwiye abaturage ko bagomba kurinda ibikorwa remezo, ababwira ko nk’umuhanda wa Kagitumba – Kayonza – Rusumo ugiye gutangira gukorwa, ko iyo umuhanda ukorwa babonamo akazi cyangwa bakagira ibyo bacuruzamo, wanaboneka kandi bakawubyaza umusaruro.

Perezida Kagame yakiriye n’ibibazo by’abaturage, yanenze bimwe mu bibazo yabajijwe bitakemuwe n’abayobozi bikarindira ko ahagera. Avuga ko bidakwiriye, yongera gusaba akomeje abayobozi kurushaho kwegera abaturage bakabumva bakabakemurira ibibazo.

Perezida Kagame akaba akomereye mu kagari ka Mbare mu murenge wa Karangazi aho naho ategerejwe n’abaturage benshi bamutegereje.

UM– USEKE.RW