i Nyarutarama kuki hari aho bita ‘BANNYAHE’? Abaho babayeho bate?

*Iryo zina ni irya kera rikava ku bahaturiye bari babuze ubwiherero
*Abahatuye ubu bugarijwe n’ibiyobyabwenge, urugomo n’ubujura
*Bafite kandi ikibazo cy’ubwiherero kuko batacukura, munsi ngo hari amazi
*Habayo cyangwa hagacumbika benshi mu nsoresore zikora ubujura gusa
*Leta ihafitiye gahunda yihariye nubwo abahatuye batazimurwa…..

Ni agace gaherereye mu murenge wa Remera mu kagari ka Nyarutarama umudugudu wa Kangondo ya kabiri muri Gasabo. Gakora ku gishanga kigabanya Nyarutarama na Kibagabaga. Hatuye abaturage babarirwa ku bihumbi bine biganjemo abakora imirimo iciriritse cyane kandi bose ngo ni abaje bahimukira baje gushaka ubuzima i Kigali.

Hazwi cyane ku izina rya ‘Bannyahe’, uri kuhagendagenda uhabona utubari twinshi duto, amazu akodeshwa mato kandi ya macye aho ushobora kubona inzu y’icyumba kimwe ukodesha ku bihumbi bitandatu (6000Rwf) gusa ku kwezi, amazu mato cyane y’ubucuruzi, abana bato benshi n’urubyiruko, urujya n’uruza rw’abantu ku manywa na nijoro…..ntabwo hatuje.

Abahatuye iyo muganira bavuga ko ari abakene, nta kazi bagira ariko ugasanga bafite utuntu dutandukanye tubatunze batabasha kukubwira uburyo tubinjiriza.

Abahatuye bakuru bavuga ko bugarijwe cyane n’ibiyobyabwenge, indaya, ubusinzi bukabije, urugomo rwa buri munsi….abahaturiye bo bakavuga ko bugarijwe cyane n’ubujura bw’insoresore ziva Bannyahe nubwo ngo naho ubwaho zidatinya kwiba abahaba.

 Abakuru bahatuye kandi bavuga ko bahangayikishwa no kuba ubu hari umubare utari muto w’abana batiga, abava mu ishuri bakishora mu bikorwa by’ubucuruzi buto, ubujura, mu buraya ndetse n’abo batera inda….abakiri bato cyane nabo ngo izi ngeso nizo bari gukura bafata.

Umwe mu bahatuye ati “dutewe impungenge n’imikurire y’abana ba hano, imico mibi niyo bari gufata benshi bagenda bareka ishuri, bakananira ababyeyi, bakaba indaya n’abajura, twe nk’ababyeyi tubona ntacyo twabikoraho kuko ushatse no kugira icyo ubwira umwana wa hano umaze gusoreka yakwirenza.”

Vedaste Nsabimana Umunyamabanga Nshingwabikorwa w’Umurenge wa Remera yabwiye Umuseke ko mu gihe gito amaze ayobora uyu murenge aha ‘Bannyahe’ hari mu hantu yasuye bwa mbere kureba imibereho y’abahatuye n’ibihavugwa.

Avuga ko yasanze ibihavugwa byinshi ari byo ariko ubu nabo bashyizeho gahunda y’ubukangurambaha igenewe aha hantu mu rwego rwo guhashya uburaya, ibiyobyabwenge n’andi mabi.

Ati “Turi kuhashyira gahunda yihariye y’umugorba w’ababyeyi kuko muri yo niho duteze igisubizo kirambye. Ababyeyi bagakangurirwa kwita ku burezi bw’abana babo kurushaho.”

Uyu muyobozi avuga ko ikibazo cy’ubujura n’ibiyobyabwenge kihavugwa nacyo bagihagurukiye bafatanyije na Polisi kuko ngo hari na benshi baheruka kuhafatirwa mu mukwabu wahakozwe wo kubahiga.

Nsabimana akavuga ko bari no gukoresha cyane Inkeragutabara mu kurara amarondo hano muri iyi ‘quartier’ mu rwego rwo kurinda ibikorwa by’urugomo n’ubujura kuko ngo usibye abajura bahaba hari n’abandi benshi baza kuhacumbika.

Uyu muyobozi akavuga ko abahatuye batazimurwa ko ahubwo ubu hari gahunda zihari zitandukanye zitanga ikizere ko ubuzima bw’abatuye aha hantu bita ‘Bannyahe’ buhinduka. Muri zo harimo n’iyo gushishikariza urubyiruko ruhatuye kwishyira mu mashyirahamwe y’ibikorwa bitandukanye  bigamije inyungu bagafashwa kubigeraho bityo ntibabone umwanya wo kwishora mu biyobyabwenge n’uburaya.

 Izina BANNYAHE ubundi ryavuye he?

Ubusanzwe aha hari ikibazo cy’imisarani kuko hari n’aho usanga inzu bakodesha mu gipangu gito ariko zidafite ubwiherero. Impamvu ngo ni uko iyo ugerageje gucukura umusarani ukimanuka uhita ugera ku mazi yo mu gishanga. Gusa siyo mpamvu hitwa gutyo uyu munsi, ahubwo izina ngo ni irya kera.

Straton Karasira, ni umusaza w’imyaka 80 ashobora kuba ari we muntu mukuru uba aha Bannyahe, avuga ko yatuye muri aka gace kuva afite imyaka 15, avuga ko bakiri abana aha hantu hari ibihuru n’ishyamba, ko ntamuntu wari uhatuye. Abantu bari batuye hafi yaho za Nyarutarama kuko nta misarani cyera bagiraga ngo niho bajyaga kwitunganyiriza.

Karasira mu myaka ngo atibuka neza kuko ari kera haje kuza umugabo Nyakabuga atema ibihuru n’ishyamba maze atangira kuhihingira.

Aba bantu bajyaga baza kuhikiriza umwanda rero abantu batangira kujya babakwena ngo bazajya bajya kubikorera he? Nuko aho hantu hahita hafata izina rya ‘Bannyahe’.

Nubwo ibibahangayikishije cyane ari imibereho yaho, uburaya, ubusinzi bukabije, ibiyobyabwenge n’ubujura, abahatuye n’abahaturiye ntibishimira iryo zina nubwo ngo ari rikuru. Ndetse bamwe mu bahatuye bakibyiruka usanga bahita ngo ni i MANCHESTER cyangwa BITMAH (Bitumahe?)

Photos/ D S Rubangura/UM– USEKE

Daddy SADIKI RUBANGURA
UM– USEKE.RW