I Ngororero ibidukikije birangirika ntihagire uvuga

Mu murenge wa Ndaro mu karere ka Ngororero mu ntara y’uburengerazuba ahari kubakwa urugomero rw’amashanyarazi ku mugezi wa Nyabarongo, uhageze ubona ko ari igikorwa cyiza, nubwo nacyo kimaze igihe kinini cyane kuko uru rugomero rwatangiye kubakwa mu 2008.

Hari amakuru yageraga k’umuseke.com atubwira ko hafi y’uru rugomero hacukurwa amabuye y’agaciro ariko abayacukura bagasiga imisozi yanamye imvura yagwa imisozi ubutaka bukayishiraho.

Ugeze ahubakirwa uru rugomero wahita witahira wishimira iki gikorwa cyiza kizaha abatuye Ngororero ndetse n’abandi amashanyarazi, ariko hirya gato uhabona imisozi iri kumarwa n’isuri bitewe n’abacukura amabuye y’agaciro bagasiga imisozi yanamye.

Nubwo twasanze abayacukura ntabahari, ariko amabuye y’agaciro yaba acukurwa aha hantu abo twahasanze bemeza ko ntacyo abamariye kuko batarabona icyo yagejeje ku bahatuye cyangwa ku karere muri rusange.

Byiringiro Mathias umwe mu bahaturiye yatubwiye ko kimwe mu bituma imirimo y’iyubaka ry’urugomero igenda buhoro harimo no kuba akakozi barwo baza bagahita biyinjirira mu bucukuzi bw’amabuye y’agaciro.

Twagerageje kuvugana n’ubuyozi bw’uyu murenge ngo tubaze icyo bakora ngo bakumire iri yangirika ry’ibidukikije ridasanzwe, ariko twavuye aha hantu nta muyobozi tubashije kubonana.

Abahatuye bo barasaba leta kubishyiramo imbaraga kuko ayo mabuye y’agaciro atabafitiye akamaro nkako ubu butaka bubacika ku bwinshi bwari bubafitiye.

Danny Manishimwe
Umuseke.com