I Muhanga kuva ku rwego rw’umudugudu bakoze inama ku iterabwoba

Mu nama mpuzabikorwa yaguye yahuje inzego z’ibanze kuva ku bayobozi b’imidugudu, ab’utugari imirenge n’abayobozi b’Akarere ka Muhanga ndetse n’inzego z’umutekano hamwe n’abahagarariye idini ya Islam bakoze inama baganira ku bikorwa by’iterabwoba byiyitirira iri dini, abafashe umwanya bose bagaragaje ko idini ya Islam nyayo ntaho ihuriye n’iterabwoba.

Abakuru b’imidugudu barenga 300 bari bahagari bavuze ko nta bimenyetso kugeza ubu bigaragara aho bayoboye byerekeranye n’iterabwoba. Usibye umusore ukomoka mu murenge wa Mushishiro uherutse gufatirwa mu bikorwa bifitanye isano n’iterabwoba mu Bugarama i Rusizi.

Beatrice Uwamariya uyobora Akarere ka Muhanga yatangaje ko impamvu y’iyi nama yari ukuvanaho urujijo ku basanisha iterabwoba n’idini ya Islam, uyu muyobozi akavuga ko nta sano bifitanye.

Uwamariya avuga ko  abiyitirira Islam bagakora ibikorwa by’iterabwoba usanga batanagirira impuhwe abo mu idini ya Islam.

Ati “Tugomba natwe gufata ingamba zo gukumira ibikorwa by’iterabwoba kandi kugeza ubu nta gikuba cyacitse haba mu Rwanda no mu karere kacu.”

Sheikh Ali Kanyankore Imam wungirije w’Akarere ka Muhanga avuga ko Islam ari amahoro, n’indamukanyo ya Islam yifuriza uyibwiwe amahoro, ko nta musilamu w’ukuri wifuza amahoro wahindukira ngo ayabuze abandi. Bityo ko abakora iterabwoba mu by’ukuri atari abasilamu.

Kanyankore avuga ko u Rwanda ari amahire ko ari igihugu kitagendera ku mahame y’idini kandi Itegeko Nshinga ryarwo riha amadini n’imyemerere yose ubwisanzure n’uburinganire busesuye imbere y’amategeko.

Colonel Paul Gaston NYEMAZI  umuyobozi w’Ingabo mu Karere ka Kamonyi, Muhanga na Ruhango, avuga ko  iyi nama itagamije kwiga ku myemerere ya Islam ko icyo abantu bakwiye kwibandaho ari ukureba uw’ariwe wese wahungabanya umutekano w’abaturage agakumirwa n’ubikoze agahanwa bikomeye.

Col Nyemazi avuga ko guhanahana amakuru no gukorana kw’abaturage n’inzego z’ubuyobozi n’umutekano ari ingenzi cyane mu kurinda umutekano no gukumira ibikorwa by’iterabwoba.

Umwe mu myanzuro yafatiwe muri iyi nama harimo kunoza ikayi y’abinjira n’abasohoka mu mudugudu no guhanahana amakuru ku mutekano mu karere ka Muhanga ku buryo bwihuse.

MUHIZI ELISEE
UM– USEKE.RW/Muhanga