Hon Mukaruriza yahaye ububasha Ministre Muhongayire wa MINEAC

Kuri uyu wa 17 Nyakanga, Hon. Monique Mukaruriza yahererekanyije ububashya na Ministre mushya ushizwe ibikorwa by’umuryango wa Afurika y’Iburasirazuba (MINEAC) Muhongayire Jacqueline mu nzu ikoreramo iyi Ministeri ku Kimihuura.

Ministre ucyuye igihe yabanje gushimira Perezida Kagame ku kizere yari yamuhaye cyo kumuragiza Ministeri nshya mu 2009, yashimiye kandi buri wese wagize uruhare mu kubaka iyi ministeri yari nshya.

Hon Mukaruriza avuga ko hari ibyo bishimira ko bagezeho birimo ibyemezo byagiye bifatwa n’ibihugu muri gahunda yo kubaka inzira za gari ya moshi, kubaka impombo za petrole, gushyiraho gasutamo imwe, gukoresha ikarita ndangamuntu imwe nk’urwandiko rw’inzira n’ibindi ngo ministre mushya azakomerezaho.

Mukaruriza utigeze akomoza ku cyatumye yeguzwa cyangwa ku byamunaniye gutunganya byasobanuwe cyane na Perezida Kagame mu cyumweru gishize, yavuze ko azakomeza gukorera igihugu aharanira kugiteza imbere mu rugamba kirimo rwo kwigira.

Ministre mushya Muhongayire  Jacqueline  nawe yashimiye Perezida Paul Kagame wamuhaye ikizere anashimira cyane Minisitiri ucyuye igihe ku mirimo yakoze mu gihe cy’imyaka itanu yari amaze ayobora MINEAC.

Yagize ati “Ndasaba abakozi tuzafatanya kunoza umurimo mu nshingano zabo zose no gukuraho inzitizi zose zatuma tutagera ku ntego zihari.

Muhongayire Jacqueline akaba yasabye uwo asimbuye Mukaruriza ko mu gihe bamwitabaza ngo abafashe muri uyu murimo yatangije yaza akabafasha, ibi akaba atabibahakaniye.

Daddy SADIKI RUBANGURA
UM– USEKE.RW