Harabura iki ngo urugomero rwa Nyabarongo rutange amashanyarazi?

Imirimo yo kubaka urugomero rwa Nyabarongo  yagombaga  kuba  yarangiye mu mpera z’ukwezi  kwa Mata uyu mwaka, ariko iza kwimurirwa   mu mpera z’ukwezi  kwa  Kanama gusa kugeza ubu mu Ukwakira urugomero ntiruratanga amashanyarazi. Mu rugendo itsinda ry’abasenateri ryakoreye  kuri uru rugomero ryatangaje ko   habura gusa  abatekinisiye batatu  ngo urugomero  rutange  amashanyarazi.

Iri tsinda ry’abasenateri bagize komisiyo y’ubukungu n’Imali babanje  gutambagizwa  ku rugomero berekwa  aho  imirimo igeze ndetse  n’ikibura ngo uru rugomero rubashe gutanga ingufu z’amashanyarazi,   imwe mu mirimo  yari itegerejwe  harimo  n’ingano y’amazi   n’igipimo  yagombye kugeraho kugirango urugomero  rutange amashanyarazi  mu gihugu hose.

Hon Mukankusi Perrine uyoboye iri tsinda yatangaje ko  kuba  amazi  ageze kuri metero cube  1 498  ari nazo  zari zitegerejwe   bitanga icyizere, gusa akavuga ko  hasigaye  inzobere z’abatekinisiye ari zo zitegerejwe muri uku kwezi kugira ngo amashanyarazi  aboneke.

Ati:’’ Hari ibibazo tekiniki byagiye bibaho byatumye  urugomero rutuzura mu gihe cyari giteganyijwe,  aho birangiriye haje kubaho  ikibazo cy’amazi make  ubu turizera tudashidikanya  ko   urugomero rugiye gutanga amashanyarazi’  

Hon Mukankusi  yongeyeho ko nta rundi rwitwazo  abashinzwe imirimo bazongera  kwerekana kuko  ingano y’amazi ari yo yonyine yaburaga,  naho abatekinisiye  bo bazaba  batangiye igerageza  mu cyumweru  gitaha.

Mugiraneza  Jean Bosco, umuyobozi mukuru w’ikigo gishinzwe  ingufu mu Rwanda yavuze ko  umutekinisiye umwe ari we  umaze kugera mu Rwanda, ko bategereje abandi batatu mbere y’uko ukwezi uku kwezi kurangira,   aba bose  bakaba ari bo  bazashyira mu bikorwa iri gerageza umuriro w’amashanyarazi ukabona  gukwirakwizwa  hirya no hino mu gihugu.

Iri tsinda ry’abasenateri bagize komisiyo y’ubukungu n’imali,  biteganyijwe  ko  bazasura  izindi ngomero z’amashanyarazi   mu karere ka Nyamagabe, Rusizi na Karongi.

Kugeza ubu  u Rwanda  rufite  megawatts 120 z’amashanyarazi mu gihugu hose, izi  zikaba ziziyongeraho izindi  hafi 28Megawatts zizatangwa n’uru rugomero rwa Nyabarongo rwuzuye rutwaye akabakaba miliyoni 100$, kimwe mu bisubizo ku bucye bw’amashanyarazi mu Rwanda.

Kugeza ubu ingo zigera kuri 18% nizo zifite amashanyarazi mu Rwanda, Leta yiyemeje ko  mu mwaka wa 2017 ingo 70%  mu Rwanda zizaba zifite  amashanyarazi.

MUHIZI Elisee
UM– USEKE.RW/Muhanga.