Gukurura abashoramari mpuzamahanga n’abo mu gihugu (III)

Mu nkuru zizakurikirana, UM– USEKE uragenda ubagezaho amavu n’amavuko ya gahunda y’ahantu hihariye h’ubukungu mu Rwanda (Special Economic Zones), icyo hagamije, icyo hazakora, ikigamijwe kugerwaho ndetse n’ibindi birebana y’Urwego rushinzwe ahantu hihariye h’ubukungu mu Rwanda. 

Iyi politiki igamije iki?

Politiki y’ahantu hihariye h’ubukungu mu Rwanda ifite intego zo kugera ku ntego z’iterambere u Rwanda rwiyemeje kugeraho; igamije kandi kongera umubare w’abashoramari mpuzamahanga no kuzamura urwego rw’abikorera bo mu gihugu. Kongera umubare w’ibyoherezwa mu mahanga no guteza imbere inganda zidashingiye gusa ku buhinzi.

Sendahangarwa John Bosco asobanura ko korohereza abashoramari bigenga, bo mu Rwanda no mu mahanga ari imwe mu ntego nyamukuru y’ahantu hihariye h’ubukungu mu Rwanda habagenewe ngo bakorere business zabo ahisanzuye.

Usibye korohereza abashoramari, aha ahantu hihariye h’ubukungu mu Rwanda hatanga imirimo ku mubare munini w’abanyarwanda cyane cyane urubyiruko.

Ubu, abanyarwanda batari bacye bari gukora mu bikorwa bitandukanye by’iyi gahunda. Urugero ahantu hihariye h’ubukungu mu Rwanda ha Kigali (KSEZ), inganda ziri kuhakorera zahaye akazi umubare utari muto w’urubyiruko.

Aho i Masoro ahari KSEZ kugeza ubu hamaze gutangira gukorerwa na kompanyi nyinshi higanjemo inganda zikora ibintu bitandukanye (Manufacturing).

Aha hantu hihariye h’ubukungu mu Rwanda hubatswe ibikorwa remezo byo ku rwego mpuzamahanga.

Abashoramari bose banezezwa no gukorera ahantu hari ibikorwaremezo bihagije bikaba akarusho iyo ibyo bakeneye byose mu kazi kabo babibona ahantu hamwe nk’aha ahantu hihariye h’ubukungu nk’ibi biri kubakwa byabugenewe.

Buri wese ukurikirana iby’ubukungu bw’igihugu cye akaba azi akamario k’abashoramari mpuzamahanga iyo bayizanye mu gihugu, umusaruro mwiza igira ku bukungu cyane cyane buvuye mu kongera ibyoherezwa ku masoko mpuzamahanga.

Ibintu byinshi bikorerwa muri bene aha ahantu bikorerwa isoko mpuzamahanga ndetse bikanagurishwa mu Rwanda kuko aba bashoramari nabo baba bakeneye no kwigarurira isoko ry’imbere mu gihugu.

Kuboneke kw’ibyangombwa inganda zikeneye ngo zikore neza kandi hamwe no kwiyongera kw’ibikorwa n’inganda bizatuma habaho guhangana ku isoko kw’abakora ibicuruzwa biri mu kiciro kimwe bituma igiciro cyabwo kidakomeza kuremerera ababikeneye.

Urwego rushinzwe ahantu hihariye h’ubukungu mu Rwanda bufatanye n’ibindi bigo bwa Leta (Mu nkuru izakurikira…..)

Soma igice cya mbere cy’iyi nkuru
Soma igice cya kabiri cy’iyi nkuru

Photos/Plaisir MUZOGEYE

ububiko.umusekehost.com