Gucunga nabi umutungo, igihombo, imyenda…biravugwa mu muryango INGABO

Mu nama yahuje abanyamuryango b’umuryango w’abahinzi borozi (Ingabo) abakozi b’ikigo gishinzwe imiyoborere, ikigo gishinzwe guteza imbere amakoperative, Ubuyobozi bw’Intara, n’akarere ka Muhanga,  bamwe muri aba banyamuryango  bavuze ko imiyoborere mibi y’ababahagarariye igiye gutuma  uyu muryango utazongera gukora.

Hashize  umwaka urenga mu muryango  w’abahinzi borzoi INGABO  havugwamo ibibazo bitandukanye birimo  imikoreshereze mibi y’umutungo w’uyu muryango iterwa n’imiyoborere mibi ya bamwe mu bayobozi bawo,  yaje no gutuma bamwe mu baterankunga bahagarika amafaranga bageneraga  uyu muryango,  ubundi ugamije kuzamura ubuhinzi n’ubworozi  mu turere twa Muhanga, Kamonyi, Ruhango na Nyanza.

Pélagie Nikuze wahoze ari umubitsi w’uyu muryango yavuze ko  Umuvugizi w’uyu muryango yihaye ububasha bwo kugurisha imwe mu mitungo y’umuryango irimo imodoka, inka no gukoresha amafaranga y’umuryango  kandi atabyemerewe n’amategeko agenga uyu muryango.

Yongeraho ko we na bagenzi be yabirukanye mu buryo bunyuranyije n’amategeko ndetse bifuza ko iyi nama ibafasha gukemura.

Habineza Joseph, umwe mu banyamuryano wari muri iyi nama  yabwiye itangazamakuru ko  amakimbirane n’imicngire mibi y’umutungo, bituruka ku bagize inama nkuru y’Ubutegetsi, akifuza ko babanza kuyisesa hagatorwa abandi  badafite uruhande babogamiyeho kuko abahari ngo bamaze guteza imyiryane  mu banyamuryango ngo bakaba baranasesaguye umutungo  byatumye umuryango  ugira igihombo kinini ku buryo kwishyura imyenda  uyu muryango ubereyemo abakozi, n’ibindi bigo bizabera  umutwaro  munini uyu muryango.

Justin Munyabega Umuvugizi w’umuryango w’abahinzi borozi (INGABO) yasobanuye ko  ibibazo umuryango ufite byatewe n’uwahoze ari umuhuzabikorwa w’uyu muryango, Umucungamali, na Pélagie Nikuze  bahimbaga  impapuro z’imikoreshereze y’amafaranga zidahuye n’ukuri  kw’imibare y’amafaranga nyayo umuryango wakoresheje.

Akavuga ko ibyo  uruhande rw’abashyigikiye Nikuze nta shingiro bifite, ko ahubwo ibyo bavuga ari ukujijisha batinya ko bazakurikiranywa n’inzego kubera kwangiza umutungo.

Ati“Ubundi twashakaga kugirisha imodoka, kugirango twishyure umwenda munini tubereyemo abakozi, n’ikigo gishinzwe imisoro n’amahoro, naho inka twagurishije yishyuriwe abanyamuryango  amafaranga y’ingendo”

Jean Marie Vianney Bwenge wari uhagarariye ikigo  cy’imiyoborere,RGB, yavuze ko  kudasobanukirwa n’inshingano ndetse n’amategeko  agenga umuryango ariyo mbogamizi ya mbere aba bakozi bafite, ari yo mpamvu bifuza kubagira inama bifashishije  amategeko  kugira ngo umuryango udasenyuka.

Abasaba kumva ko ari bo bagomba gufata iya mbere bakubaka umuryango wabo, ko hagmba kubaho igenzura  ryimbitse mu rwego rwo kumenya neza umubare w’amafaranga  yanyerejwe n’ababigizemo uruhare bakabibazwa.

Abakozi b’uyu muryango bavuga ko bamaze amezi 10 arenga badahembwa,  uwahoze ari umuhuzabikorwa bamushinja kuba yaranze gukora ihererekanya bubasha kuko yasize akinze ikigo akigendera.

Muri iyi nama basabye ko inzego zifatanya n’abanyamuryango gushaka uko uyu muhuzabikorwa atanga ububasha mu gihe cya vuba. Imyenda  ya miliyoni 50   uyu muryango  ubereyemo  abakozi n’ibindi bigo nawo ukishyurwa.

Elize MUHIZI
UM– USEKE.RW/Muhanga