Giporoso: Kizimyamwoto z’abaturage zatumye inzu y’ubucuruzi idashya ngo ikongoke

Inkongi y’umuriro yibasiye inzu y’ubucuruzi iherereye mu karere ka Kicukiro mu murenge wa Kanombe mu kagari ka Giporoso, yabashije kuzima hakoreshejwe kizimyamwoto z’abaturage nyuma zaje kunganirwa n’iza Polisi y’igihugu.

Iyi nzu y’uwitwa Budeyi iherereye ku muhanda ugana Kabeza, yakoreragamo ivuriro rikoresha imiti karemano ryitwa Isange Herbal Medecine Ltd ry’uwitwa Camarade Jean Damascene (Bamwita Dogiteri Camarade) n’ishuri ryigisha ibyo gutwara imodoka.

Iyi nzu yatangiye gushya mu masaha y’igicamunsi saa cyenda abazimya umuriro babasha kuwuzimya saa kumi.

Abari aha batangarije Umuseke ko uyu muriro waba watewe n’amashanyarazi, ndetse binemezwa n’umuganga w’iri vuriro.

Uyu muganga witwa Mbarushimana Theoneste yavuze ko mbere y’uko Polisi y’Igihugu itabara, abaturage ngo nibo babanje kuzana kizimyamwoto ntoya batunze mu ngo bagerageza kuzimya umuriro ariko nyuma Polisi iza kubafasha kuzimya burundu iyo nzu.

Muri iyi nzu hahiriyemo ibitanda abarwayi (abazaga gukoresha massage baryamagaho), intebe zarimo n’ameza na byo byahiye n’imwe mu miti ndetse n’utubati n’imashini zisuzuma n’igisenge cy’inzu cyahiye.

Umukozi uhakorera yabwiye Umuseke ko atazi agaciro k’ibyahiriye muri iyi nzu.

Amafoto/Evode Mugunga/UM– USEKE

Evode MUGUNGA
UM– USEKE.RW