Gicumbi: Umugore w’imyaka 21 yiyahuye akoresheje agatambaro bifubika

Kuri uyu mbere tariki 10/10/2016 mu ma saa sita n’ igice  mu kagari ka Gisuna mu murenge wa Byumba umugore w’imyaka 21 yapfuye bivugwa ko basanze yiyahuye akoresheje igitambaro cyo kwifubika bita ‘esharpe’. Birakekwako yaba yihoye ko yanduye SIDA.

Umugabo babanaga ariko batarasezerana kuko ngo babiteguraga yabimenye atashye mu karuhuko ka saa sita.

Uyu mugore ngo basanze yanditse ubutumwa mu nzu akoresheje ikara asaba umbabazi uyu mugabo babanaga hamwe n’ababyeyi be kuko ngo yanduje SIDA uyu mugabo biteguraga kurushinga. Ngo yasabaga ko bamubabarira.

Gahano JMV Umunyamabanga Nshingwabikorwa w’Umurenge wa Byumba yatangarije Umuseke ko uyu mugore ngo basanze yiyahuje kiriya gitambaro cyo kwifubika.

Ati “Nibyo byabaye, yakoresheje Esharpe kandi umurambo we bawusanze muri douche.”

We n’uyu mugabo biteguraga kubana byemewe n’amategeko ngo bari batuye mu mudugudu wa Nyiragasuruba mu kagari ka Nyamabuye mu murenge wa Byumba.

Amakuru bamwe mu baturanyi b’uyu muryango bahaye Umuseke ni uko nta makimbirane yari hagati ye n’umugabo we kuko bari banamaranye amezi macye babana.

Bakemeza ko kumenya ko yanduye SIDA aribyo byaba byatumye yiyahura.

Police yatangiye iperereza kuri uru rupfu, hashakishwa amakuru arambuye ku rupfu rw’uyu mugore kugeza ubu bikekwa ko yiyahuye.

Evence NGIRABATWARE
UM– USEKE.RW/Gicumbi