Gicumbi: Ku myaka 17, yabyaye umwana aramuniga, amujugunya mu musarani

Mu karere ka Gicumbi mu murenge wa Byumba mu kagari ka Nyarutarama habayeho ubwicanyi bukorewe umwana w’uruhinja rukivuka ibi byakozwe n’uwari kuba umubyeyi we nawe w’umwana w’umukobwa w’imyaka 17.

Uyu mwana w’umukobwa (udatangazwa kubera imyaka ye) yemera ko kuri uyu wa 13 Ukwakira yafashe umwana yari yabyaye amwica amunize maze asubiye kwa muganga ngo yivuze neza abaganga bamubajije aho umwana ari ababwiza ukuri ko yamujugunye mu musarani.

Kwa muganga niho amakuru yaturutse, kuko ngo yabaye nk’uwanga kubabwira aho umwana yamushyize aje kwivuza, ariko hashize umwanya abemerera ko uwo yabyaye yamujugunye mu musarani.

Inzego zo kwa muganga zamenyesheje iz’ubuyobozi ziratabara zisanga koko umwana ari mu musarani nk’uko umunyamakuru w’Umuseke i Gicumbi abitangaza. Polisi iri gukora iperereza ngo irebe niba ntawundi muntu wagize uruhare muri ubu bwicanyi ku mwana w’uruhinja.

Uyu mwana w’umukobwa acumbitse kwa Clementine Munyana wari nyina wabo, wamaze kugezwa kuri Polisi ngo hakorwe iperereza ryimbitse ku rupfu rw’uriya mwana wari ukivuka.

Ngezahumuremyi Theoneste, Umunyamabanga nshingwabikorwa w’Umurenge wa Byumba yabwiye Umuseke ko nawe yamenye ukuri kw’aya makuru ayabajije umuyobozi w’Akagali ka Nyarutarama byabereyemo.

Ngezahumuremyi Theoneste avuga ko uyu mwana yari amaze umwaka n’igice avuye mu ishuri. Akagira inama ababyeyi kurinda abana babo kuko nk’uyu mwana ngo aho ababyeyi batuye neza hatazwi kuko ngo bamenye ko uyu mwana yanacumbitseho i Kigali.

Uyu mubyeyi gito ukiri umwana ubu ari kwa muganga ku bitaro bya Gicumbi  aho ari kwitabwaho ngo akire neza.

Evence NGIRABATWARE
UM– USEKE.RW/Gicumbi