Gicumbi irifuza Eric N, Kayiranga muri Sunrise, Casa muri APR. IBIVUGWA mu batoza

Nyuma y’impera za shampiyona y’imikino y’umwaka wa 2013/2014, hashobora kuba impinduka nyinshi mu batoza b’amakipe y’ikiciro cya mbere mu Rwanda, ku ikubitiro Gicumbi FC na Sunrise nizo ziri gushyira imbaraga mu gushaka umutoza muri shampiyona itaha ya 2014/2015.

Amakuru agera ku Umuseke aremeza ko ikipe ya Gicumbi yaba yifuza cyane umutoza Eric Nshimiyimana wirukanwe mu ikipe y’igihugu Amavubi.

Umwe mu bayobozi bakuru b’ikipe ya Gicumbi FC utifuje ko izina rye rishyirwa ahagaragara yavuze ko bifuza umutoza nka Eric Nshimiyimana.

Yagize ati “ Nibyo turifuza umutoza ufite izina rikomeye  kandi uzi insinzi icyo ivuze”

Yemeza ko bavuganye na Eric Nshimiyimana ariko akaza kubaca amafaranga menshi agereranyije nayo twashakaga kumuha.

Amakuru atugeraho aremeza ko Eric Nshimiyimana yasabye umushahara w’amafaranga y’u Rwanda miliyoni imwe n’ibihumbi magana tanu (1500 000 frw) ku kwezi mu gihe Gicumbi yifuzaga kumuha miliyoni imwe y’amanyarwanda.

Biravugwa ko kandi mu gihe Eric byaba byanze bavugisha umutoza Ruremesha usanzwe utoza ikipe ya Espoir cyangwa Okokko Godfroid utoza ikipe ya Amagaju.

Mu makipe menshi abayobozi bayo usanga ku makuru nk’aya bavuga ko ntacyo bayavugaho kuko ngo baba “batarabyemeza.”

Andi makuru ku ihinduranya ry’abatoza aravuga ko Kayiranga Baptiste wari usanzwe atoza ikipe ya Gicumbi FC, uyu munsi ashobora kuza kurara yemejwe nk’umutoza mukuru wa Sunrise FC iherutse kuzamuka mu kiciro cya mbere. Sunrise ikaba yarazamuwe n’umutoza Gatera Mussa

Hari amakuru kandi avuga ko umutoza wa APR FC Vicent Mashami yaba ari kwifuzwa mu ikipe y’igihugu Amavubi kungiriza umutoza Stephen Constantine, ahanini kuko uyu muzungu atabasha kumvikana mu rurimi (na Cassa Mbungo André yasanze mu Amavubi)

Bikaba bivugwa kandi ko uyu Cassa Mbungo André ashobora guhita yerekeza mu ikipe ya APR FC gusimbura Mashami Vincent.

Mu ikipe ya Rayon Sports imaze iminsi itozwa na Mbusa Kombi Billy, ho ngo umutoza bazamushaka nyuma y’igikombe cy’Amahoro.

Ikipe ya Mukura nayo Umunyamabanga mukuru wayo Nshimiyimana Emmanuel yabwiye Umuseke ko Mukura VS iri kuvugana n’umutoza Kanyankore Gilbert uzwi ku izina rya Yaounde, wahoze atoza Kiyovu. Umutoza mushya bakazamwerekana tariki 15/06/2014.

Kassim Rugamba we yamaze kugirwa umutoza wungirije muri Kiyovu Sports ku masezerano y’umwaka umwe. Umuyobozi wa Kiyovu akaba yabwiye Umuseke ko batari bazi amakuru y’uko Kanyankore ari kuvugana na Mukura ariko yemeza ko ari uburenganzira bwe.

Paul NKURUNZIZA
ububiko.umusekehost.com