Geneve: UNHCR bugufi gutanga amabwiriza ku bihugu bifite impunzi z’abanyarwanda

Kuri wa gatanu tariki 9 Ukuboza 2011, intumwa za leta y’ u Rwanda zitabiriye inama mu ngoro yitwa Palais de Nation i Geneve mu Busuwisi. Iyi inama yateguwe na UNHCR  yai mu rwego  rwo kuganira ku mahame  ajyanye no kurangiza ibibazo by impunzi z’ Abanyarwanda.

Izi ntumwa zikaba ziyobowe na Minisitiri w’Imicungire y’Ibiza n’ impunzi Generali Marcel Gatsinzi.

Muri izi ntumwa harimo umunyabanga nshingwabikorwa  wa Leta  mu kanama ngishwanama ku miyoborere Prof.Shyaka  Anastase,  ambasaderi w ‘u Rwanda  mu muryango w ‘abibumbye, akaba kandi ahagarariye n’inyungu z’u Rwanda mu miryango mpuzamahanga Solina  Nyirahabimana na Fatuma ndangiza wari ambassaderi y’ u Rwanda muri Tanzania.

Ingingo nkuru zari ku murongo w’ ibyigwa ni ukongera gusuzuma amahame  ajyanye no kurangiza ibibazo by impunzi z’ Abanyarwanda.

Hakaza kurebwa inzitizi zikigaragara mu ishyirwa mu bikorwa ry’ amasezerano  ajyanye no kurangiza ibibazo by’impunzi z’ Abanyarwanda.

Iyi nama yabaye kuri uyu wa gatanu yashyizeho umurongo njyenderwaho ku bijyanye no kubahiriza, gutangaza no gushyira rmu bikorwa icyemezo cy’ikurwaho ry’ ubuhunzi  rusange ku banyarwanda.

Iyi nama yateguwe n’ishami ry’Umuryango w’Abibumbye ryita ku mpunzi ,UNHCR, ikaba ije ikurikira iya 62 ya komite nyobozi y’ uwo muryango yabaye mu kwezi kwa cumi, aho yari yanzuye ko hazabaho gutangaza ikurwaho ry’ ubuhunzi  rusange ku banyarwanda tariki ya 31 Ukuboza 2011. No gutangira gushyira mu  bikorwa iki cyemezo guhera tariki ya  30 Kamena 2012.

Mu rwego rwo gushyira mu bikorwa uyu mwanzuro, UNHCR ubu  riri gutegura gutanga amabwiriza ku bihugu kugira ngo bizatangaze icyemezo cyo gukuraho sitati y’ubuhunzi rusange ku banyarwanda nk’uko byanzuwe.

Uruhare rw’  ibihugu birebwa no gutangaza ndetse no gushyira rmu bikorwa iki cyemezo cy’ikurwaho  ry’ ubuhunzi  rusange ku banyarwanda, kikaba nacyo cyahawe umwanya wihariye.

Ibi bihugu byasabwe  kurushaho gushyira imbaraga ku gushishikariza impuzi z’ Abanyarwanda gutaha ku bushake, no kurushaho kumvisha impunzi nyishi zishoboka zirebwa n’iki cyemezo cy’ikurwaho  ry’ ubuhunzi  rusange mbere y’uko cyashyirwa mu bikorwa.

Iyi nkuru turayicyesha minisiteri yo gucunga Ibiza no gucyura impuzi.

Jonas Muhawenimana
UM– USEKE.COM