Gasabo: Akarere kiteze umusaruro uhagije mu gihembwe cy’ihinga A

Kuri uyu wa mbere tariki 15 Nzeri, ubwo yatangizaga igihembwe cy’ihinga A, Willy Ndizeye umuyobozi bw’Akarere ka Gasabo yaratangaza ko kubufatanye n’abahinzi biteguye neza iki gihembwe, ndetse ngo baniteze umusaruro uhagije n’ubwo bagifite impungenge ku mihindagurikire y’ikirere ishobora gutuma imyaka ibura amazi cyane cyane ko Akarere ntayo gafite ahagije.

Gutangiza igihembwe cy’ihinga A mu Karere ka Gasabo byabereye mu murima munini uherereye mu Mudugudu wa Karama, mu Kagari ka Nyabikenke, mu Murenge wa Bumbogo. Ubu butaka bwahoze ari ubw’Akarere ariko buza kwegurirwa Koperative nyuma y’uko abari bahatuye bimuwe hakegurirwa abakorera mu matsinda y’ubuhinzi, ndetse kugeza ubu abaturage bakorera mu matsinda ahinga muri ubu butaka bemeza ko bibafasha kwikura mu bukene no kwiteza imbere.

Ndizeye Willy yavuze ko ubusanzwe iki gihembwe cy’ihinga A aricyo bitegura cyane kuko ari nacyo gikunze gutanga umusaruro mwinshi ugereranyije n’ibindi bihembwe. Ati “Dufite n’icyizere kubera imvura yatangiye kugwa neza kugeza ubu.”

Ku bijyanye no kuhira imyaka nk’imwe muri gahunda za Guverinoma zo guhangana n’ikibazo cy’imihindagurikire y’ibihe, Ndizeye akavugako bitakorohera abahinzi bo mu Karere ka Gasabo kuko abenshi bagiye bafite amasambu ahingwamo ku misozi, iyi ngo ari nayo mbogamizi Akarere kabona ishobora kubangamira intego zo kongera umusaruro w’ubuhinzi kihaye.

Abahinzi bo mubice bimwe na bimwe by’Akarere ka Gasabo babashije kwishyira hamwe mu matsinda, bikabafasha kuganira ku bibazo bahura nabyo mu buhinzi no gufashanya hagati yabo mu kubikemura.

Daddy SADIKI RUBANGURA

UM– USEKE.RW