Gakenke: Umugabo yishe umugore we amukubise amabuye mu mutwe

Amajyaruguru – Mu murenge wa Busengo Akarere ka Gakenke abaturanyi b’umuryango wa Rwajentakeka na Mukarubayiza babwiye Umuseke ko uyu mugabo yishe umugore we kuri uyu wa mbere amukubise amabuye mu mutwe, ibi byaje kandi kwemezwa na Police muri iyi Ntara yahise ita muri yombi uyu mugabo.

Triphonia Mukarubayiza w’imyaka 60 mu gitondo cyo kuwa mbere tariki 18 Mata yashyamiranye n’umugabo we Flavien Rwajentakeka w’imyaka 64 maze uyu aramwadukira amukubita amabuye mu mutwe, abaturanyi batabaye basanga uyu mugore arembye cyane.

Uyu mugore yajyanywe ku kigo nderabuzima cya Busengo ariko agezeyo ahita apfa kubera ibikomere.

Inspector of Police Innocent Gasasira umuvugizi wa Polisi y’u Rwanda m Ntara y’Amajyaruguru yabwiye Umuseke ko uyu muryango wapfaga amakimbirane akomoka ku bibazo by’amasambu byahoraga bizamura intonganya hagati yabo.

IP Gasasira ati “Ntabwo bari basanzwe babanye neza, ejo baratonganye amukubita (umugabo) amabuye menshi mu mutwe, bamujyanye kuri centre de Sante ahita ashiramo umwuka.”

Police y’u Rwanda ikunze gukora ubukangurambaga bushishikariza Abanyarwanda kwirinda kwihanira, kwirinda cyane ihohotera rikorerwa mu ngo no kugeza ibibazo by’amakimbirane mu ngo ku nzego zibishinzwe.

Police ivuga ko umubiri w’uyu mugore wishwe wajyanwe ku bitaro bya Nemba, naho Rwajentakeka ushinjwa kwica umugore we ubu akaba afungiye kuri station ya Police ya Cyabingo.

Martin NIYONKURU
UM– USEKE.RW