Frank Lapmard mu gahinda gakomeye

Imyaka 10 amaze muri Chelsea nubwo ari myinshi, ntibimubujije kuba ubu ari mu gahinda gatuma ashobora kuva muri iyi kipe.

Lampard wari ku rutonde rw’abasimbura ku mukino batsinze Swansea kuri uyu wa gatandatu 4-1, ntiyigeze akoreshwa nubwo yari tayari gukina uyu mukino.

Yategereje ko asimbura iminota 83 yose, inzozi ze zo gukina umukino wa 350 muri shampionat y’abongereza, zirangizwa no kubona bashyizemo akana kitwa Josh  McEachran gasimbuye Raul Meireles, we yibwiraga ko ariwe wari kujyamo.

Ibi byatumye Lampard ahita ahaguruka yigira mu rwambariro nyuma yo kubona ko umutoza Andre Villas Boas atamufite muri gahunda ze.

Nyuma yo kuva mu mvune, akaba yiteguye gukina Lampard amaze kwicazwa imikino 3 iheruka Chelsea yakinnye, n’uwo batsinzwemo na Manchester yasohowe hakiri kare.

Nubwo umutoza wa Chelsea yemeza ko Lampard ari umukinnyi ukomeye kandi azagarura vuba, ibi ngo ntibibuza ko Frank Lampard, Chelsea yavanye muri West Ham mu 2001, atakiyumva cyane mu ikipe nka mbere.

Si muri Chelsea gusa Lampard biri kumwangira kuko no mw’ikipe y’igihugu, umutoza Fabio Capello aherutse gutangaza ko Lampard atazakomeza kuba umukinnyi ubanzamo nka mbere kuko Scott Parker na Jack Wilshere ngo bari bari kumwiyereka cyane kumurusha.

Muri Chelsea naho akaba afite ibibazo nyuma yo kuhagera kwa Raul Meireles ndetse na Ramires wari uhasanzwe, tutibagiwe na Juan Mata wazanywe ngo akine hagati ahe imipira Fernando Torres abe yareba izamu noneho.

Frank Lampard aza ku mwanya wa kane mu bakinnyi bakiniye Chelsea imikino myinshi inyuma ya Ron Harris, Peter Bonetti na  John Hollins.

Murenzi F.
UM– USEKE.COM