Film ya Horeur iri gukinwa bwa mbere mu Rwanda

Umubare w’amafilimi akorwa mu Rwanda uracyari muto cyane ugereranyije no mu karere, biterwa n’ubucye bw’ibikoresho, abakinnyi (acteurs), abazitunganya (producers), abazandika…nyamara ariko filimi ni kimwe mu bintu bishobora kuzamura ubukungu ukurikije uburyo abantu bazikunda.

Mu Rwanda hamenyerewe filimi zo mu bwoko bwa ‘Drama’, izisekeje, izivuga ku mateka n’izindi zidasaba amikoro menshi. Ubu hari abatangiye kugerageza gukora filmi zidasanzwe zikinwa mu Rwanda. Horreur/Horror movies.

Iyi ni filimi iteye ubwoba (Dramatic Horror) iri gutunganywa na Shyaka Olivier Rosh w’imyaka 24 ukorera muri Almond Tree Films.

Iyi Film iri gukinwa ubu yayise “ The Wooden Secret” ikazaba ikoze mu buryo budasanzwe mu Rwanda. Uyu musore avuga ko amaze imyaka ibiri ayitegura harimo umwaka yamaze mu mahugurwa yahuriyemo n’abandi bahanga mu gutunganya izo film.

Shyaka avuga ko abamuhuguye muri ayo mahugurwa barimo abari ku rwego rwo gutwara Oscar Awards nka James  Bertand Longley wakoze  film  izwi  cyane  ku  isi  “Iraq  In  Fragments”.

Iyi filimi nyarwanda yo mu bwoko bw’iziteye ubwoba yafatiwe amashusho mu mpera z’ukwezi kwa Mata ubu ikaba iri gutunganywa muri studio ikazasohoka mu mpera z’ukwezi kwa munani uyu mwaka.

Mani Martin umenyerewe muri muzika gakondo nyarwanda, niwe mukinnyi w’ibanze muri iyi filimi. Shyaka Olivier nyiri filimi yemeza ko Mani Martin usibye impano ya muzika we yamusanganye n’impano ikomeye yo gukina filimi.

Ati “ Mumwitege muri filimi iteye ubwoba bwa mbere y’inyarwanda”.

Plaisir MUZOGEYE
UM– USEKE.RW