FIFA yategetse FERWAFA kwishyurwa 35 000$ Blanco Tucak yambuwe

Uwahoze ari umutoza w’ikipe y’igihugu Amavubi Blanco Tucak hagati ya 2008 na 2009 ntiyishyuwe amadorari agera ku 35 000$ (21 000 000Frw).

FIFA ikaba yategetse ubuyobozi bushya bwa FERWAFA kwishyura uyu mutoza w’umunya Croatie nta mananiza mu gihe cy’ukwezi kumwe nkuko tubikesha ruhagoyacu.com

Blanko Tucak akiri umukinnyi wakiniye ikipe ya Nancy na Metz mu Ubufaransa, yabonye akazi ko gutoza Amavubi mu kwezi kwa Mata 2008 aza kwirukanwa mu 2009 kubera umusaruro muke.

Uyu mutoza ubu udafite akazi, yaba yarahembwaga agera ku 15 000$ by’amadorari ku kwezi kumwe n’izindi nyongera (advantages) zitandukanye, amafaranga aberewemo avuze ko yaba yaramaze amezi 3 adahembwa.

Kudahembwa mu ikipe y’igihugu si ubu bivuzwe gusa, abatoza bagiye bungiriza abatoza bakuru mu ikipe y’igihugu (twavuga nka Thomas Higiro, Eric Nshimiyimana, Yves Rwasamanzi, Ruremesha Emmanuel n’abandi) bakaba nabo bafitiwe ibirarane by’amafaranga batishyuwe mu myaka yashize.

Blanko nyuma yo kwandikira FIFA ayisaba kumwishyuriza akaba agize amahirwe y’uko FIFA yabimukoreye. Amakuru agera k’UM– USEKE.COM akemeza ko Ministeri y’Imikino yaba igiye guhita yishyura uyu mutoza nta mananiza.

Aba bandi bagiye bungiriza yenda nabo bashobora kuboneraho.

Gael Nkubito
UM– USEKE.COM