FDLR irakekwaho gufata bugwate ba ‘Imam’ 6 b’AbaTanazania. Igasaba 20,000$

Kuri uyu wa kabiri ni bwo Umuryango w’Abayisilamu muri Repubulika Iharanira Demokarasi ya Congo (COMICO) watangaje ko ukekwa ko umutwe wa FDLR ari wo washimuse abayobozi bo mu idini ya Islam (Imam) batandatu bakomoka muri Tanzania hamwe n’umushoferi wabo w’Umukongomani. Aba barwanyi ubu ngo barasaba amadolari ibihumbi 20 kugira ngo barekure aba bagabo.

Aba ba ‘Imam’ batandatu bakomoka muri Tanzania n’umushoferi wabo bashimuswe ku itari ya 02 Kanama muri ‘Territoire’ ya Rutshuru muri Kivu ya ruguru hakambitse abarwanyi b’umutwe wa FDLR.

Umuhuzabikorwa w’Umuryango w’Abayisilamu muri Repubulika Iharanira Demokarasi ya Congo; El Hadji Masudi yagize ati “ ubusanzwe bashinze ibirindiro mu ishyamba rya Rutshuru, hari abantu babakurikira,. Aba bafashe bugwate bari kubaka UDS 20,000.”

Akomeza avuga ko yizeye ko aba bagabo bafashwe n’abarwanyi b’uyu mutwe ufatwa nk’uhungabanya umutekano w’akarere ka Afurika y’Uburasirazuba bazarekurwa kuko iki gikorwa cyagejejwe ku matsinda ya societe civile arwanya ibikorwa nk’ibi muri Kivu ya ruguru.

Ati  “ntidufite amafaranga ariko twizeye ko bazabarekura vuba. Aba bavandimwe bo muri Tanzania bari baje mu gikorwa cyo kwigisha ijambo ry’Imana.”

Thomas Mwiti uyobora amatsinda ya societe Civil akorera muri Kivu ya ruguru we avuga ko iki gikorwa cyakorewe aba bagabo bo muri Tanzania gishobora kwangiza umubano igihugu cyabo (RDC) gisanzwe gifitanye na Tanzania.

Thomas Mwiti avuga kandi ko kuva mu ntangiro z’uyu mwaka abantu bakabakaba 500 bamaze gushimutirwa mu territoire ya Rutshuru.

Mu mwaka wa 2013; perezida wa Tanzania; Jakaya Kikwete yahamagariye Leta y’u Rwanda kugirana ibiganiro bigamije kumvikana na FDLR irimo bamwe mu basize bakoze Jenoside yahitanye Abatutsi bagera muri miliyoni.

Uyu mutwe wa FDLR wiyita ko “Uharanira amahoro” wakunze gutungwa agatoki kuba uhungabanya umutekano w’akarere.

Minisitiri w’Itangazamakuru muri Repubulika Iharanira Demokarasi ya Congo akaba n’umuvugizi w’iki gihugu; Lambert Mende aherutse gutangaza ko abarwanyi ba FDLR basigaye muri Kongo Kinshasa batarenga 400.

mgafrica

Martin NIYONKURU
UM– USEKE.RW