Fabrice Muamba yavuye mu bitaro

 Kuri uyu wa 16 mu masaha ya nimugoroba, nibwo mukinnyi wa Bolton Wonderers Fabrice Muamba amaze kuva mu bitaro bya London Chest Hospital, ni nyuma y’ukwezi agize ibibazo byo guhagarara k’umutima ubwo yari mu kibuga.

Muamba,24 kuri uyu wa mbere yanditse itangazo mu ma saha ashize rigira riti “Ubu navuye mu bitaro nishimiye kuba njye kumara igihe ntora akuka ndikumwe n’umuryango wanjye“.

Muamba Fabrice yari agiye kwitaba Imana bitewe n’impanuka yo guhagara k’umutima ku itariki ya 17 Werurwe mu mukino wa ¼ cy’igikombe cy’Ubwongereza FA Cup ubwo  ikipe ye ya Bolton Wanderers  yakinaga na Tottenham Hotspurs kuri stade White Hart Lane i Londres.

Icyo gihe umukino ugeze hagati umukinnyi Muamba yikubise hasi umutima uhagara gutera iminota 78 nyuma, benshi bakaba bari baziko ibya Muamba byarangiye, nyuma yo kugarurira umutima we ubuzima, abaganga batangaje ko ari igitangaza cyabayeho.

Fabrice Muamba amaze gusohoka yagize ati : “Nishimiye kuva mu bitaro ndetse mboneyeho muri aka kanya gushimira abaganga bose bakora mu bitaro London Chest Hospital bagize uruhare mu kunyitaho“.

“Ubwitange, ubunyamwuga n’ubuhanga bakomeje kugaragaza ntibyari bisanzwe, igihe cyose nzabyibuka” byanditse mu itangazo rito ryasohowe na Muamba.

HATANGIMANA Ange Eric
UM– USEKE.COM