Espoir BBC yatsinze Patriots yari yayirushije mu duce dutatu tw’umukino

Remera/Gasabo – Mu mukino ukomeye cyane wabaye mu ijoro ryo kuri uyu wa gatandatu Patriots yari yakiriye Espoir BBC warangiye Espoir ifite igikombe cya shampionat ishize itsinze ku manota 71 kuri 68 mu mukino washimishije cyane abawukurikiye kuko warimo Basket nziza no guhangana gukaze.

Patriots ifite abanyamuryango benshi kandi b’abanyamafaranga yaje yizeye cyane kongera gutsinda Espoir y’ikigugu muri Basket yo mu Rwanda. Patriots iyi ikaba inaheruka gutsinda indi mikino ibiri yahuje aya makipe.

Niko byatangiye, Patriots y’abasore nka Aristide Mugabe, Ali Kazingufu, Elia n’abandi itangira itsinda rwose, quart temps ya mbere, iya kabiri n’iya gatatu zose zarangiye Patriots irusha Espoir, iya gatatu yarangiye ku manota 54 kuri 49 ya Espoir.

Espoir yagowe cyane no kwinjiza amanota atatu (three point shouts) kuko Lionel Hakizimana ukunze kuyinjiza mu mikino uyu munsi utari uwe na busa, inshuro yagerageje nyinshi zanze.

Patriots y’umutoza Henry Mwinuke wo muri Tanzania yo abakinnyi bayo bo bagaragaje ubuhanga cyane, Aristide Mugabe na Ally Kazingufu bakoze amanota menshi bakanatanga imipira myinshi yavuyemo ibitego.

Muri quart temps ya nyuma ibintu byahindutse, Patrick Buzangu (mukuru wa Buzangu Mike) wa Espoir BBC wazamuraga umupira (meneur de jeux) akinisha cyane Bienvenue Ngandu bita Jobu, umu ‘pivot’ w’imbaraga nyinshi n’ibigango koko. Maze akora amanota menshi we na mugenzi we Olivier Shyaka nawe ukina nka Pivot.

Patriots bahagaritse umuvuduko wayo mu gutsinda, maze Espoir mu munota itanu ya nyuma ica kuri Patriots, hasigaye iminota ibiri y’umukino Espoir yari ifite 67 kuri 61 ya Patriots.

Aristide Mugabe yahise akora amanota atanu ya Patriots amakipe yombi arakubana bikomeye, habura amasegonda 26, Espoir yari ifite amanota 69 kuri 68 ya Espoir, bakora ikosa kuri Bienvenue Ngandu maze yinjiza neza lancer-francs bagira amanota 71 bacunga neza amasegonda yari asigaye umukino urangira gutyo.

Abafana bari benshi kuri uyu mukino bishimiye uko wagenze, bishimiye urwego rwiza rwa Basket babonye kuri aya makipe ndetse no guhangana kwari guhari.

Umutoza Henry wa Patriots yatangaje ko agifite ikizere cyo gutwara igikombe ariko bizaterwa n’uko bazitwara ku mukino bafite na IPRC-South i Huye muri week end itaha.

John Bahufite utoza Espoir nawe yavuze ko uyu mukino atsinze utumye agira ikizere ko nabo bashobora kwisubiza igikombe cya shampionat ya Basket,  bamaze imyaka itanu batwara bikurikiranya.

Nubwo Patriots yatsinzwe iracyari imbere muri shampionat, Espoir yahise ifata umwanya wa kabiri nubwo aya makipe yombi anganya amanota 20.

Roben NGABO
UM– USEKE.RW