Episode 79: Aliane yambitswe impeta atunguwe. Aho bari bari havutse imvururu!

Twese – “Woow!”

Aliane – “Dorle! Sha urakoze cyaneee! Ntabwo twabona uko tugushimira gusa icyo nakwizeza nuko ukoze ibikomeye kuri Nelson, umunsi umwe ndabizi azakwitura kandi natanabikora Imana yo izakwitura.”

Dorlene – “Ooh! Erega sha kubaho ni ukugaragirana, ejo wenda ni njyewe! Icyo nkwijeje cyo nuko ntakubona urengana ngo mbyirengagize kandi mfite ukuri.”

Njyewe – “Yooh! Dorle, warakoze cyane kundwanirira ishyaka, nzahora nsoma urukuta wanditseho amateka yanjye uyu munsi, kandi iteka nzajya nzirikana ko wanshiriye akanzu.”

Dorlene – “Ooh my God! Utantera amarira sha Nelson! Ni ukuri ongera utuze kandi ukomere ndahari n’ibitari ibi nzabikora maze uwahaye ukuri intebe azabone ko burya intumwa y’ukuri itajya ikumirwa.”

Njyewe  – “Wow! Uri umukobwa mwiza kandi wisesuye ubuhanga buhanga bushya ubuzima bw’abashoboye kukwegera. Dorle, aka gaflash ndakabika kure kandi umunsi nzakitabaza uzabe uhari urebe inshuro wakubise abatanshira akari urutega.”

Dorlene – “Ooh! Humura nzaba mpari sha!”

Njyewe – “Alia, sinabura kugushimira by’umwihariko, warakoze cyane kuko ibi byose ni wowe mbikesha. Iyo utaza kundwanirira ishyaka ngo ngaragaze ukuri kwanjye ntabwo mba mfite icyizere nk’icyo mfite nonaha.

Ni ukuri uwagira inshuti yagira nkawe kuko waruse izo nari nizeye, wanyitayeho umbonye nkuze ntiwategereje kubaza ubuto bwanjye, narahangayitse urabibona uca mu kayira kawe ngo nzakunde mbe uwo nifuza kuba we. Humura byose nta na kimwe nzibagirwa kandi ukora ineza aba ategurira abazamukomokaho kugaba amahirwe.”

Aliane – “Nelson, rekera aho ni ukuri ntahogora!”

Dorlene – “Yooh! Disi niboneye bya bindi Aliane yajyaga ambwira, ese mama ni iri juru mwiberamo?”

Twafashe akanya gato k’umutuzo, tumaze kururutsa imbamutima turebana ibineza tumwenyurira rimwe Dorlene ahita avuga.

Dorlene – “Sha, reka nsubire hariya mu mahugurwa ndebe ko nacyura umubyizi nimugoroba ndaza kubacaho tujyane ahantu dufate agafiriti ndumva mu isakoshi hankirigita.”

Aliane – “Wow! Ntiwumva se! Nicyo nkwemerera erega! Nanjye ndaba mpari ntabwo ndi busibe ndakambura data!”

Twese – “Hhhhhhhhh!”

Njyewe – “Dorle, merci beacoup turasubira.”

Dorlene yarahagurutse aradusezera arasohoka, aragenda njye na Aliane dusigara aho dokomeza akazi n’imbaraga nyinshi, noneho numvaga nkomeye ndetse mfite n’icyizere cyinshi. Burya icyizere kirarema kandi ni inkingi idahengama kabone n’iyo waba uhagaze ku manga.

Amasaha yakomeje kwicuma akazi turagasoza mu gihe tugitegereje ko Dorlene aduha map y’aho tujya kukamirira, mba ngiye online namwe murabyumva nari ngiye kubwira my all and only sweetness, Brendah inkuru nziza y’ibyo Dorlene yari amaze kunkorera.

Twakomeje kwiganirira byinshi saa kumi n’imwe ziragera, saa kumi n’ebyiri dupanga kwitahira tugihaguruka ngo dufunge dutahe tubona Gorette Gigi arinjiye njye na Aliane turikanga.

Aliane – “Yee? Dore Gigi ni ukuri?”

Gigi – “Alia, mbabarira ntacyo mumbwira mwaranyanze!”

Aliane – “Have se utarakara nta mugeni urakara ari mu kwa buki!”

Njyewe – “Gigi, welcome! Nubwo tukurimo ideni ariko nta mugabo utagira ideni nta n’umugabo utaryishyura!”

Gigi – “Ntiwumva se ahubwo, ako kantu ko kuryishyura niko nkuyemo, andi makuru se sha we?”

Njyewe – “Ni meza cyane ni ukuri turashima Imana.”

Gigi – “Byiza cyane! Nanjye meze neza murabibona.”

Aliane – “Yego sha! Umeze neza byo pe! Umugabo atanga itoto koko ndabibonye!”

Twese – “Hhhhhhhh!”

Gigi – “Urabivuga urabizi? Ahubwo gira vuba wowe na Nelson namwe mwumve uko Jesus agira neza!”

Njyewe – “Aliane se ko yanteye amabuno! Ahubwo rata nzakuzanira umukazana unshimire naho kundebera byo ntawe ushima atarebye!”

Gigi – “Hhhhhh! Ntiwumva se! Nelson, ako kantu ahubwo!”

Aliane – “Ko udusuye bwije se?”

Gigi – “Sha nari nje kubareba rero ngo tuvugane ku byerekeye bya bindi navugiye imbere yanyu mu bukwe bwanjye.”

Njyewe – “Uuuh! Biriya bya ziriya nzu se?”

Gigi – “Yego! Buriya naratunguwe kandi biranshimisha nsanze ari mwe mukodesha hariya, ndifuza rero ko mwamfasha tugashyira ukuri hanze, bariya bahemu bagakorwa n’isoni!”

Aliane – “Gigi! Harya ngo buriya hariya warahabaye?”

Gigi – “Yego sha! Winyibutsa Boss ukuntu yambereye inzira yangejeje aha ndi uyu munsi.”

Njyewe – “Yooh! Twarabyumvise byose ukuntu yagukuye ku muhanda mubyara wawe amaze kuhagusiga.”

Gigi – “Byihorere sha Nelson, ubu ndashaka kuhagaba ibirindiro ngategereza byibuze ko kera kabaye nabona umwana umwe wasigaye, wameneshejwe na Karekezi niba wenda yaba akiriho. Alia, Nelson, ndabasabye niba bishoboka mumfashe turwanirire ukuri.”

Aliane – “None se sha ko nta gihamya dufite cyemeza ko koko izo nzu atari iza Karekezi twahera he tugaragaza ukuri?”

Gigi – “Oya, n’iyo twakwivanga muri gahunda ze, ariko tukamutesha gutagaguza iby’abandi.”

Aliane – “Niba ari ibyo byo, Nelson arabishoboye!”

Njyewe – “Gigi, rwose ibyo wavuze byose cya gihe twarabyumvise kandi byadukoze ku mutima, gusa si nzi niba hari icyo twakora kuko nawe urakuze urabizi ko kuri ubu ibimenyetso ari byo biza imbere y’ukuri. None se uramutse ushoje urugamba twazana abagabo bahamya ngo Gigi yaratubwiye ngo?”

Gigi – “Sha nanjye mpora nibaza icyo nakora ni na yo mpamvu nje kubareba ngo mungire inama nkamwe muhaba.”

Aliane – “Gigi, njye ndumva nta kindi wakora keretse ufite amafaranga ukahagura nk’uko waguze ya shop bari bafite watubwiye, ari nayo ukoreramo ubu, naho ubundi ntiwazungura ibyo udafitiho ububasha!”

Gigi – “Ahwiii! Sha nanjye ibyo nahoroga mbitekereza gusa nta mafaranga mfite yagura hariya hantu kuko ubu ndakishyura umwenda wa bank ndimo.”

Njyewe – “Yooh! Nta kundi ihangane Gigi, ariko ubundi kugurisha hari icyo bivuze? Uwo mukobwa nyiraho niba akiriho akazaza, azabarege uwayiguze afatane na Karekezi twifanire!”

Gigi – “Ariko uzi ko ari byo! Reka tureke kurwana n’ubusa igihe nikigera byose bizigaragaza, ahubwo se disi ubu nzamenya nshakira he? Ni ukuri buri gihe mba numva akiriho!”

Aliane – “None se wigeze umushaka Gigi?”

Gigi – “Oya sha! Kuva twatandukana namenye irengerero rye ari uko umugabo wanjye ambwiye ariya mateka y’umukobwa wabaga iwabo ngasanga ari we.”

Njyewe – “None se ubwo tugufashe iki Gigi? Ahubwo se amazina ye yitwaga nde?”

Gigi – “Sha twamwitaga Mawuwa nk’uko Papa we yakundaga kurimuhamagara andi mazina ye rero ntayo nari nzi.”

Nelson – “Ubwo se umuntu yahera he ra?”

Aliane – “Nta n’ifoto ufite se?”

Gigi – “Mana wee! Sha hari amafoto mfite ariko ni aya kera akiri umukobwa, ubu yarahindutse ntabwo mwamumenya.”

Njyewe – “Ntacyo uzapfe kuyazana tuyafotore tuyaposting online nibigera ahantu henshi nta wamenya hashobora kugira umubona akamumenya.”

Aliane – “Ariko uzi ko ari byo! Gigi, uzayazane dushakire aho nta wamenya wabona habonetse nk’uwo babanye kera akaba amuzi ubu, cyangwa na we akibona akatubaza tukamubwira byose.”

Gigi – “Yego sha! Reka njye gutanga care ubwo nzayazana ejo!”

Aliane – “Nibe nawe sha!”

Twese – “Hhhhhhh!”

Gigi yaradusezeye aragenda, njye na Aliane duhita dusohoka turakinga dufata umuhanda ujya mu rugo tugeze imbere gato tubona moto iduparitse imbere mu kureba uyivuyeho yari Dorlene.

Dorlene – “Mbega mwebwe! Uzi ko nta gahunda yanyu! Habe no kumbaza niba nisubiye koko?”

Njyewe – “Hhhhh! Ubwo se tukubajije amande twayaguca gute?”

Aliane – “Yego ra! Ahubwo niyo tukubona twari kukwihisha!”

Twese – “Hhhhhh!”

Dorlene – “Sha natinze ndi kwishakira amakuru mumbabarire!”

Njyewe – “Ye? Ayahe makuru se kandi?”

Dorlene – “Umva yewe! Alia, ibyo biraza nyuma, ahubwo se ushobora kumanuka aho ugeze mbona icyapa gishushanyijeho imishito?”

Twese – “Hhhhhhh!”

Aliane – “Mana wee! Uzi ko ntari nabonye ko duhagaze ku muryango w’akabari?”

Ako kanya twahise tumanuka gato twinjira muri ako ga pub twicara hirya mu nguni maze umwe mu basore bakoraga aho aza kutwakira.

We – “Karibu!”

Dorlene – “Stareh! Niko se we? Hano hari station ngo tunyweshe ko dufite urugendo rurerure?”

Twese – “Hhhhhhh!”

We – “Irahari rwose!”

Dorlene – “Ok! Njye nzanira fanta citron ishyushye, Aliane umuzanire ubushera Nelson we umuhe ikigage, ni njye mbagurira ntibakubeshye!”

Twese – “Hhhhhhhhhh!”

Twarasetse tujya hasi, mu by’ukuri urebye Aliane ukuntu yari atuje ndetse acecetse cyane ntiwashoboraga kumenya ko yadusetsa bene ako kageni. Gusa nyuma y’ibyo nahise nibuka ko burya guceceka atari uko nyirabyo aba atazi kuvuga, mbona neza ko umuhanga wo kuvuga atavugaguzwa ahubwo avuga abwira umwumva.

Tumaze gutuza twatumye icyo kunywa dukoresha na commande y’agafiriti, dukomeza kuganira hashize akanya wa mu serivaire aza aho twari turi.

We – “I am Sorry, hano ngo hari umuntu witwa Aliane ra?”

Aliane – “Biciye kuri television se?”

We – “Oya! Ni umuntu untumye ngo narebe hariya hirya!”

Ako kanya akibivuga twese twabaye we, duhindukirira rimwe tureba hirya dukubitana amaso na Bruno, azamura ikirahuri natwe tuzamura ibyacu we n’umusore bari kumwe bahita bahaguruka baza aho twari turi we na Aliane barahoberana bimara agahinda ubundi natwe baradusuhuza baricara.

Aliane – “Cheri, hano niho usigaye waransimbuje se?”

Bruno – “Eeeh! Oya sha! Uzi ko ari ubwa mbere nje hano hantu!”

Njyewe – “Oya, ahubwo mwe muratubeshya mwari mufitanye gahunda yo guhura twabavumbuye!”

Bruno – “Hhhhhh! Wapi kabisa hari umugabo wari umpamagaye ngo duhurire hano none ndahageze ndamutegereza ndamubura mpita mbona uyu muvandimwe tuba twiganirira.”

Bruno akivuga gutyo tubona hinjiye abasore nka batanu, mu kureba neza mba mbonye Ganza, ndebye uwari amwegereye mbona ni Bruce bitangira kunshanga nkibyibaza mbona Gasongo yinjiye asakuza cyane ngo: “Ariko mwabuze aho mwicara? Muze tujye hepfo hano ni ku karubanda!”

Gasongo akivuga gutyo bose baramukurikiye bamanuka hepfo mpindukiye mpuza amaso na Aliane ahita avuga.

Aliane – “Nelson, uramubonye nawe?”

Njyewe – “Ndamubonye ni we kabisa!”

Aliane – “Ko nikanze se koko Mana yanjye dukore iki?”

Twese twaracecetse akanya gato, Dorlene, Bruno na wa musore bari kumwe birabacanga.

Dorlene – “Ko mutugurishije make se?”

Bruno – “Ahubwo ubanza batugurishije badukopye!”

Twasetsemo ariko njye naramwenyuye kuko nahise nsa n’ujya kure nibaza igihuje Gasongo na Bruce nzi ndetse na Ganza, ariko cya cyizere kirema gikomeza kumpumuriza.

Twakomeje kuganira byinshi commande iraza turya agafiriti twaka akandi ka round ako kanya Dorlene ahita atubwira.

Dorlene – “Alia, kuva wavuka wari wishima?”

Aliane – “Dorle, kubera iki umbajije icyo kibazo?”

Dorlene – “Uzi ko koko bose ari bamwe? Ikibazo ugisubirishije ikindi rero wanze kwica umuco?”

Twese – “Hhhhhhh!”

Dorlene – “So, nari nabasohokanye ahangaha wowe na Nelson ariko ayanjye ashizemo ndumva Bruno yahaguruka akadusengera tukitahira ni we ntari numva ijwi rye!”

Twese – “Hhhhhhh!”

Bruno – “Ok! Reka mpaguruke ariko na none simpaguruke njyenyine niba hano hari uwakwishimira guhagurukana nanjye arwaneho yigaragaze.”

Twese – “Ako kantu!”

Bruno yarahagurutse maze ako kanya Aliane amuhagurukaho tubaha amashyi abari inyuma yacu bose barahindukira.

Bruno – “Woow! Ntureba, iki ni cyo nari ntegereje, umwanya ni uyu ngo ururimi rwikarage maze mvuge ntategwa ko ari wowe ukwiye kumpagarara iruhande, imyaka ibaye myinshi nshaka uwo tuzahagararana maze nkabona amashyi nk’aya none umpamirije ukuri ubinyerekera hagati mu nshuti zawe. Alia, ndagukunda cyane!”

Twese – “Wooooow!”

Bruno – “Aka kanya rero ndifuza ko…”

Bruno yahise akora mu mufuka akuramo aka box karimo impeta, atera ivi afata Aliane ikiganza maze aravuga.

Bruno – “Alia, ndagukunda cyane! Wanyemerera nkakwambika iyi mpeta ihamya ko ari wowe nifuza ko dutangirana urugendo njye nawe nk’umugore umbereye natoranyije mu bandi?”

Akibivuga naratunguwe bikomeye, burya ibyo nitaga blague yari surprise nyayo ya yindi y’umwimerere? Woooow!

Aliane akibyumva yabuze aho akwirwa yipfuka mu maso, hashize akanya aripfukura mbona amarira y’ibyishimo ahereza ikiganza Bruno amwambika impeta twese dushyiraho akadomo k’amashyi.

Aliane amaze guhagurutsa Bruno yahise amuhobera baricara, ibyishimo byakomeje kurenga Aliane, twe twitegerezaga ibyo byiza by’imbonekarimwe bisigira buri wese icyifuzo gikwiye.

Hashize akanya gato k’umutuzo, Dorlene ahita avuga.

Dorlene – “Uwo ni wo mutwaro w’ibanga maze iminsi nikoreye. Alia, nizere ko ntongera kukubaza ngo nawe umbaze! Noneho se urishimye?”

Aliane – “Wa rwana we!”

Twese – “Hhhhhhhh!”

Twakomeje kuganira, aho twari turi hari umunezero, ibitwenge byinshi. Aliane yitegereza impeta akaducira udusiri, tukiri muri ibyo, twumvise ikintu kimeze nk’icupa gishwanyukiye hepfo ha handi ba Ganza na ba Gasongo bamanutse bajya abantu bose barikanga.

Aliane – “Yesu we! Ibyo ni ibiki we?”

Njyewe – “Ahubwo se ko numva basakuza cyane?”

Bruno – “Ubwo barasinze batangiye gusumirana!”

Ako kanya Bruno akivuga gutyo umusore umwe yahingutse muri salle twari turimo yambaye ubusa hejuru, abantu bari bicaye ku meza yari ari iruhande rwacu bahaguruka biruka tuyoberwa ibyo ari byo…………………

Ntuzacikwe na Episode ya 70 muri Online Game……………

**************