DRC: USA na EU basabye ko internet isubizwaho

Kuri uyu wa Kabiri, ibihugu byigeze Umuryango w’Ubumwe bw’u Burayi na Leta zunze ubumwe z’Amerika byasabye ubutegetsi bwa Kinshasa gusubizaho internet. Ngo yavuyeho nyuma y’amatora yabaye ku Cyumweru izasubizwaho nyuma yo gutangaza ibyayavuyemo.

Abahagarariye EU na USA muri DRC basohoye itangazo rigira riti: “ Turasaba guverinoma ya DRC gusubizaho uburyo bw’itumanaga rikoresha internet.”

Ambasaderi mushya wa USA muri DRC witwa Mike Hammer yanditse kuri Twitter yifuriza abaturage ba DRC kuzagira umwaka mushya muhire kandi urimo umutuzo, Demukarasi.

Yasabye ko Internet yasubizwaho kugira ngo abaturage bakomeze kuganira no kumenya uko amakuru ahagaze mu gihugu cyabo giheruka mu matora y’Umukuru w’igihugu.

Ku wa Mbere taliki 31, Ukuboza, 2018 nibwo  Guverinoma ya DRC yakuyeho internet.

Kuva icyo gihe kandi ntibishoboka kohererezanya ubutumwa bugufi.

Kumva Radio Mpuzamahanga y’Abafaransa RFI ukoresheje umurongo wa FM( 105.00FM) ntibishoboka i Kinshasa.

Ubuyobozi bushinzwe ibiganiro kuri RFI buvuga ko guhera ku wa Mbere nyuma ya saa siti z’amanywa imirongo yayo ivugira i Kinshasa na Beni yavuyeho.

Iyi radio yakurikiraniraga hafi kandi igatangaza uko amatora yo ku Cyumweru  yagenze muri iriya migi.

Itangazo risaba Leta ya Kinshasa gusubizaho Intenet ryasinywe n’abahagarariye EU na USA hamwe n’abahagarariye ibihugu bya Canada, Ubusuwisi, Ubufaransa,  Ububiligi, Ubwongereza, Ubuholandi na Suwede.

Ririya tangazo kandi ryasabye rikomeje ko indorerezi zakurikiranye uko amatora yagenze, zakwemererwa kugera ahantu hose zifuza kugira ngo zirebe uko amajwi abarwa.

Jeune Afrique yanditse ko nyuma yo gukusanya impapuro z’itora zivanywe ku biro by’itora, zigomba gusuzumwa, zikajyanwa ku biro by’uturere tw’itora zikazahava zijyanwa ku biro bya Komisiyo yigenga y’amatora (Céni).

Jean Pierre NIZEYIMANA

UM– USEKE.RW