Difaa El Jadida yo muri Maroc iri i Kigali, ije guhangana na AS Kigali

Ni abakinnyi b’ibizigira ugereranyije n’aba AS Kigali, ikipe ya Difaa Al Jadida yakoze imyitozo ya mbere ku kibuga cya FERWAFA i Remera kuri uyu wa kane nimugoroba, ni mbere y’umukino ubanza wa 1/8 wa CAF Confederation cup bazakina na AS Kigali kuwa gatandatu i Nyamirambo. 

Mwanafunzi Albert umuvugizi wa AS Kigali yatangaje ko uyu mukino abakunzi b’umupira w’amaguru bazawurebera ubuntu ku myanya isigaye yose.

Mwanafunzi avuga ko ahatwikiriye ariho hazishyuzwa kuri uyu mukino. Agasaba ko abanyarwanda babishoboye kuza gushyigikira AS Kigali mu rugamba nyafrika irimo.

Difaa Al Jadeeda, ikipe yakinnyemo Said Abed Makasi ubu ukina muri Espoir FC i Rusizi, ibigwi ifite ni uko mu 1986 yageze muri 1/4  cy’iri rushanwa rikitwa CAF Cup winners cup, umwaka wa 2011 yaviriyemo mu makipe 32, naho mu 2010 iviramo mu majonjora muri irushanwa rya CAF Champions Ligue.

Ikipe ya AS Kigali yo ikaba ari ubwa mbere igiye muri iri rushanwa yitwa AS Kigali, iriherukamo mu yitwa Les Citandins 2000 itozwa na Sogonya Hamiss bita Kishi, ubu ibashije gukomeza yaba ikoze amateka akomeye kuri yo, nta kipe yo mu Rwanda irarenga 1/4  mu marushanwa nyafrica.

Photos/Paul Nkurunziza

Damas Nkotanyi
ububiko.umusekehost.com