David Villa wa Barcelona yavunitse ruseke

David villa agiye kumara igihe kitari munsi y’amezi atandatu adakina umupira w’amaguru kubera kuvunika igufa ry’akaguru k’ibumoso.

Uyu rutahizamu w’imyaka 30, yavunitse mbere gato y’uko igice cya mbere kirangira mu mukino wa kimwe cya kabiri cy’imikino y’igikombe cy’isi cy’amakipe yabaye ayambere ku migabane yayo na Al Sadd, i Yokohama mu Ubuyapani.

Twitter ya FC Barcelona yanditse ngo: “Inkuru y’akababaro kuri David Villa na Barcelona, yavunitse igufa rya Tibia ry’akaguru k’imoso”

Villa ntamuntu wamuvunnye, yavunitse ubwo yageragezaga gukandagira nyuma yo gushaka gutera umupira, yahise ajyanwa mu bitaro bya Yokohama Rosa muri uyu mujyi nyuma gato y’iyi mvune.

Uyu mukino warangiye ikipe ya Barcelona itsinze 4-0 bwa Al Saad yo muri Qatar ihagarariye umugabane wa Aziya, Barcelona ikaba yabonye ticket yo gukina umukino wanyuma.

Ni ubwa kabiri Villa avunika igufa ry’ukuguru kwe, ku myaka ine akiri iwabo mu majyaruguru ya Espagne, David Villa yavunitse igufa ry’akaguru k’iburyo, ibi byatumye amaze gukira yiremamo gukinisha n’akaguru k’imoso, biza gutuma uyu musore abasha gukinisha amaguru yombi (ambidextrous) kugeza ubu.

Villa yaguzwe miliyoni 34 z’amapound ava mu ikipe ya Valence mu 2010. Yatangiriye umupira we mu majyaruguru ya Espagne mu ikipe ya Sporting Gijon.

Ibitego bya Barcelona ku mukino wa Al Saad warangiye kuri uyu wa kane, byatsinzwe na Adriano watsinze 2, Seydou Keita na Maxwell.

Umukino wanyuma Barcelona yegukanye igikombe itsinze  Santos yo muri Brazil 4-0

Ange Eric Hatangimana
UM– USEKE.COM