David Moyes YIRUKANYWE muri Man U, Giggs araba amusimbuye

Ubu byemejwe n’ubuyobozi bw’ikipe ya Manchester United, ko David Moyes yirukanywe muri Manchester United, Ed Woodward umuyobozi mukuru w’iyi kipe ngo yabyibwiriye imbonankubone uyu mutoza mu gitondo cyo kuri uyu wa kabiri ahagana saa mbili za mugitondo.

Amakuru ya Dailymail aremeza ko David Moyes n’ubwo yari yiteguye iyi nkuru, uwo muyobozi yamusanze u kibuga cy’imyitozo cya Carrington akamubwira ko yasezerewe.

Ku rubuga rwa Twitter rw’iyi kipe hagaragayeho amakuru muri iki gitondo yemeza iyirukanwa ry’uyu mutoza, anamushimira umurimo yahakoze.

Mu mpeshyi y’umwaka ushize nibwo uyu mutoza wo muri Ecosse yahawe iyi kipe, iki gihe yari asimbuye Sir Alex Ferguson wari ugiye muzabukuru.

Nubwo yasinye imyaka itandatu y’amasezerano, abaherwe bo mu muryango wa Grazzer bafite iyi kipe ngo baribamaze kurambirwa gutsindwa kw’iyi kipe, cyane ubwo kuri iki cyumweru yatsindwaga n’ikipe ya Everton 2 – 0, kwihangana kwabo ngo kwaba kwarangiriye aha.

Uwo yasimbuye, umukambwe Sir Alex Ferguson yakomeje kenshi gusaba iyi kipe kwihanganira uyu mutoza no kumuha igihe, nubwo ba nyiri ikipe ngo baba bo barambiwe. Muri ‘saison’ ye ya mbere mu 1986 Sir Alex Ferguson yatsinze imikino 12 gusa.

Sir Ferguson we mu myaka 27 yamaze atoza Manchester yatwayemo ibikombe 13 bya shampionat na 2 bya UEFA Champions League, gusa mu myaka ye ibiri ya mbere ntacyo yigeze abasha gutwara.

Ryan Giggs ariwe uhita ufata umwanya wo gutoza iyi kipe kugeza shampionat irangiye, mu gihe bagishakisha umutoza wundi mukuru.

Mu batoza bavugwa bashobora kuza muri iyi kipe harimo umuholandi Louis van Gaal, umutoza wa Borussia Dortmund  witwa Jurgen Klopp uzasezera nyuma y’igikombe cy’Isi na Laurent Blanc utoza Paris St-Germain.

Mu mikino 51 David Moyes yatoje Manchester kuva yahagera yatsinzemo 27 atsindwa 15 anganya inshuro 9.

Uyu mutoza yirukanywe ikipe isigaje imikino ine ya shampionat ngo irangire, iyo ni uwa

Norwich City kuwa gatandatu, Sunderland kuwa gatandatu tariki 03 Gicurasi, Hull City tariki 06 Gicurasi na Southampton tariki 11 Gicurasi, iyi mikino ikazatozwa na Ryan Giggs.

ububiko.umusekehost.com