Cycling baratahana ishema, Volleyball irazana umudari umwe

All Africa Games/Brazzaville – Ikipe y’u Rwanda ya Volleyball y’abagabo irataha amara masa nyuma y’uko mu ijoro ryacyeye itsinzwe na Misiri ku mukino bahataniraga umudari wa Bronze. Gusa muri Beach Volley abakobwa babiri b’abanyarwanda bo begukanye umudari wa Bronze, naho abasiganwa ku magare baratahana imidari ibiri harimo umwe wa zahabu. Aya makipe akaba agomba guhaguruka agaruka mu Rwanda.

Ikipe ya ‘Team Rwanda’ iratahana ishema kuko izanye umudari wa zahabu wegukanywe na Hadi Janvier mu gusiganwa 150Km, ndetse n’uwa Bronze bari batwaye mu gusiganwa ku makipe. Aba baragera i Kigali ku mugoroba wo kuri uyu wa kabiri bakiranwe icyubahiro kuko bahesheje ishema igihugu cyabo.

Charlotte Nzayisenga na Denyse Mutatsimpundu bakina beach volley nabo barataha bemye kuko bazanye umudari wa Bronze begukanye ku cyumweru batsinze Kenya seti ebyiri ku busa. Bakurikira Nigeria(1)  na South Africa baje imbere yabo.

Mu ijoro ryo kuri uyu wa mbere, ikipe y’igihugu ya Volleyball y’u Rwanda yatsinzwe na Misiri seti eshatu kuri ebyiri (27-25, 24-26, 26-24, 17-25, 13-15) bigoranye cyane kuko bakijijwe na seti ya Seoul u Rwanda rwatsinzwe kuri 13 – 15 ya Misiri ubusanzwe ya mbere muri Africa, u Rwanda rubura umudari wa Bronze gutyo.

Ku mukino wa nyuma wakurikiyeho mu bagabo Algeria byihuse yatsinze Congo Brazzaville seti eshatu ku busa (25-20, 25-22, 27-25) yegukana umudari wa zahabu.

Ikipe za Volleyball zarangije kurushanwa biteganyijwe ko nazo zitaha none cyangwa kuwa gatatu aho zizanye umudari umwe uzanywe na bariya bakobwa.

Mu ijoro ryo kuri uyu wa mbere kandi, abakinnyi b’u Rwanda Felicien Muhitira na Eric Sebahire basiganwe n’abandi muri 10Km ku maguru  Muhitira yabaye uwa 8 akoresheje  iminota 29n’amasegonda 23 naho Sebahire aba uwa 10 akoresheje iminota 30, amasegonda 24.

UM– USEKE.RW